ईसा तडवी, प्रतिनिधी
पाचोरा, 1 नोव्हेंबर : पाचोरा-भडगाव विधानसभा मतदारसंघाचे आमदार किशोर आप्पा पाटील यांचा आज वाढदिवस असून मतदारसंघात विविध ठिकाणी कार्यक्रम पार पडत आहे. किशोर आप्पा पाटील यांच्या वाढदिवसानिमित्त आज सायंकाळी शिवसेनेच्या निर्धार मेळाव्याचे आयोजन करण्यात आले आहे. दरम्यान, या निर्धार मेळाव्यात पाचोरा नगरपरिषदेच्या निवडणुकीसाठी शिवसेनेच्या नगराध्यक्षपदाचा उमेदवाराची घोषणा होणार असून आमदार किशोर आप्पा पाटील हे आगामी स्थानिक स्थानिक स्वराज्य संस्थांच्या निवडणुकीचं रणशिंग फुंकणार आहेत.
पाचोऱ्यात निर्धार मेळाव्याचे आयोजन –
आमदार किशोर आप्पा पाटील यांच्या वाढदिवसानिमित्त पाचोरा कृषी उत्पन्न बाजार समितीच्या आवारात आज सायंकाळी शिवसेनेचा निर्धार मेळावा पार पडणार आहे. जळगाव जिल्ह्याचे पालकमंत्री गुलाबराव पाटील यांची या मेळाव्यासाठी प्रमुख उपस्थिती लाभणार आहे. निर्धार मेळाव्यासाठी शिवसेनेकडून जय्यत तयारी करण्यात आली असून पाचोऱ्यात आज शिवसेनेचे शक्तीप्रदर्शन पाहायला मिळणार आहे.
मेळाव्यात यांची असेल उपस्थिती –
आमदार किशोर आप्पा पाटील यांच्या वाढदिवसानिमित्त आयोजित केलेल्या निर्धार मेळाव्यात आमदार चंद्रकांत सोनवणे, आमदार चंद्रकांत पाटील, आमदार अमोल पाटील, माजी आमदार शिरीष चौधरी, शिवसेना सचिव भाऊसाहेब चौधरी, जळगाव जिल्हा शिवसेना संपर्क प्रमुख सुनिल चौधरी, युवतीसेनेच्या डॉ. प्रियंका पाटील, जिल्हाप्रमुख विष्णू भंगाळे, पाचोरा कृषी उत्पन्न बाजार समितीचे सभापती गणेश पाटील, वासुदेव पाटील, महिला आघाडी जिल्हाप्रमुख सरिता माळी यांच्या शिवसेनेचे पदाधिकारी-कार्यकर्ते मोठ्या संख्यने उपस्थित राहणार असल्याची माहिती पाचोरा शिवसेनेकडून देण्यात आली आहे.
