बीड, 30 मे : राज्यात मे महिन्यात झालेल्या पावसामुळे अनेक ठिकाणी शेतकऱ्यांचे नुकसान झाले आहे. असे असताना बीड जिल्ह्यातील आष्टा तालुक्यातील शिंदेवाडी येथील शेतकरी महेश दरेकर यांचा तीन एकर शेतीत पिकवलेला कांदा हा पाण्यात गेला. दरम्यान, चिखलात गेलेला कांदा गोळा करण्यासाठी शेतकरी कुटुंबाला मोठे प्रयत्न करावे लागले. यावेळी शेतकरी महेश दरेकर यांची मुलगी प्रगती देखील वडिलांच्या मदतीला धावली आणि कांदा गोळा चिखलातला कांदा गोळा करतानाचा तिचा व्हिडिओ सोशल मीडियावर प्रचंड मोठ्या प्रमाणात व्हायरल झाला.
मुलीच्या शिक्षणासाठी शब्द दिलेल्या बापाची निराशा –
महेश दरेकर यांनी त्यांच्या तीन एकर शेतीत कांदा लावला होता. हा कांदा पिकवल्यानंतर त्यांनी शेतात काढून ठेवला होता. मात्र, मार्केटमध्ये नेण्याआधीच हा मुसळधार पावसामुळे कांदा चिखलात गेला आणि तीनशे गोणी कांद्याचे पावसाच्या पाण्यात भिजून गेला. यानंतर महेश दरेकरांनी त्यांच्या कुटुंबियांसोबत चिखलातून कांदा गोळा करायला सुरूवात केली. यावेळी त्यांची मुलगी प्रगतीने देखील वडिलांना कांदा गोळा करण्यासाठी मदत केली. दरम्यान, मुलीच्या शिक्षणासाठी शब्द दिलेल्या बापाची या अस्मानी संकटामुळे निराशा झाली.
मिलिंद नार्वेकर यांचा प्रगतीच्या शिक्षणासाठी मदतीचा हात –
महेश दरेकर आणि त्यांची मुलगी प्रगती यांचा कांदा गोळा करतानाचा व्हायरल झालेल्या व्हिडिओची दखल ठाकरेंच्या शिवसेनेचे विधानपरिषद आमदार मिलिंद नार्वेकर यांनी घेतली आणि प्रगतीच्या शिक्षणासाठी मदतीचा हात दिलाय. प्रगतीच्या कुटुंबियांसोबत संवाद साधून त्यांनी प्रगतीच्या शिक्षणासाठी 1 लाख रूपये मदत देत असल्याचे सांगितले. तसेच 1 लाख रूपये ही रक्कम खूप कमी असली तर थोडाफार दिलासा त्यामाध्यमातून मिळेल. प्रगती तुझी प्रगती होणार आहे, असेही मिलिंद नार्वेकर म्हणाले. दरम्यान, मिलिंद नार्वेकरांनी प्रगतीच्या शिक्षणासाठी मदत केल्याने तिच्या आईसह कुटुंबियांनी समाधान व्यक्त करत आभार मानले.
