जळगाव : गेल्या काही दिवसात गुन्हेगारीच्या घटनांमध्ये मोठ्या प्रमाणात वाढ होत आहेत. तसेच जळगाव जिल्ह्यातही गुन्हेगारीच्या घटनांमध्ये सातत्याने वाढ होत असल्याचे दिसत आहेत. यातच आता आणखी एक धक्कादायक घटना समोर आली आहे. जळगाव जिल्ह्यातील चाळीसगावमध्ये मध्यरात्री गोळीबार झाल्याची धक्कादायक घटना समोर आली आहे. गँगवॉरमधून ही गोळीबार झाल्याची माहिती समोर आली आहे.
काय आहे संपूर्ण घटना –
जळगाव जिल्ह्याच्या चाळीसगाव शहरात मध्यरात्रीच्या सुमारास हवेत गोळीबार करण्यात आला आहे. शहरातील पोद्दार इंटरनॅशनल स्कूलजवळ अज्ञात व्यक्तींनी दगडफेक केली आणि हवेत गोळीबार केला. तर बाळू मोरे खून प्रकरणातील संशयित आरोपी सुमित भोसले यांच्या घरासमोर हा गोळीबार झाला आहे. दहशत निर्माण करण्यासाठी पूर्व वैमनस्यातून हा गोळीबार करण्यात आल्याचा अंदाज पोलिसांनी वर्तवला आहे.
6 संशयित आरोपी फरार –
चाळीसगाव शहरातील मध्यरात्रीच्या सुमारास झालेल्या या गोळीबाराच्या घटनेनंतर घटनास्थळावरून 6 संशयित आरोपी 3 दुचाकीवरून फरार झाले. त्यांचा घटनास्थळावरून पळून जातानाचा सीसीटीव्ही व्हिडीओ समोर आला आहे. या सीसीटीव्ही व्हिडीओच्या माध्यमातून गोळीबार करणाऱ्या आरोपींचा शोध घेत आहेत. दरम्यान, पोलिसांनी संशयित आरोपींच्या घराची झडती देखील घेतली आहे. यावेळी पोलिसांना संशयिताच्या घरातून काही घातक शस्त्रे आणि जिवंत काडतुसं आढळून आली आहेत. या प्रकरणी चाळीसगाव पोलिसांनी दोन वेगवेगळे गुन्हे दाखल केले आहेत.
मागच्या वर्षी फेब्रुवारी महिन्यात बाळू मोरेंची हत्या –
दरम्यान, मागील वर्षी फेब्रुवारी महिन्यात भाजपचे चाळीसगाव नगरपालिकेचे माजी नगरसेवक महेंद्र मोरे उर्फ बाळू मोरे यांची हत्या करण्यात आली होती. मोरे हे आपल्या कार्यालयात बसलेले असताना पांढऱ्या रंगाच्या कारमधून आलेल्या काही अज्ञातांनी त्यांच्यावर हल्ला केला. हल्लेखोरांनी बाळू मोरे यांच्यावर गोळ्या झाडल्यानंतर हे हल्लेखोर कारमधूनच पसार झाले होते. या गोळीबारानंतर मोरे यांचा उपचारादरम्यान मृत्यू झाला. आता ताज्या गोळीबाराच्या प्रकरणात मोरे यांच्या हत्येचे कनेक्शन असल्याचे सांगितले जात आहे. ज्याच्या घरासमोर गोळीबार झाला, तो सुमित भोसले बाळू मोरे हत्या प्रकरणातील संशयित आहे. पोलिसांनी याप्रकरणी गुन्हा दाखल केला असून पोलीस पुढील तपास करत आहेत.
‘सुवर्ण खान्देश’चे प्रतिनिधी ईसा तडवी यांचा पिंपळगाव (हरेश्वर) पोलीस स्टेशनच्या वतीने सन्मान
