मुंबई : ‘नमो शेतकरी महासन्मान निधी योजने’च्या सहाव्या हप्त्यांतर्गत उद्यापासून 93.26 लाख शेतकरी कुटुंबांना लाभ वितरित केला जाणार आहे. या अंतर्गत 2169 रुपयांची कोटींची रक्कम शेतकऱ्यांच्या आधार व डीबीटी संलग्न सक्रिय बँक खात्यात थेट जमा होणार आहे, अशी माहिती मुख्यमंत्री देवेंद्र फडणवीस यांनी दिली.
सोशल मीडिया प्लॅटफॉर्म एक्सवर देवेंद्र फडणवीस यांनी याबाबतची माहिती देत शेतकऱ्यांच्या उन्नतीसाठी घेतलेल्या या महत्त्वपूर्ण निर्णयासाठी पंतप्रधान नरेंद्र मोदी यांचे आभार मानले.
नमो शेतकरी महासन्मान निधी योजनेच्या सहावा हप्ता निधी वितरण
शेतकऱ्यांना निश्चित उत्पन्न देण्याकरीता केंद्र शासनाने प्रधानमंत्री किसान सन्मान निधी (पी. एम. किसान) योजना माहे फेब्रुवारी, 2019 पासून सुरु केली आहे. या योजनेच्या निकषांनुसार सर्व पात्र शेतकरी कुटुंबास (पती, पत्नी व त्यांची 18 वर्षाखालील अपत्ये) 2000 रुपये प्रती हप्ता या प्रमाणे तीन समान हप्त्यात प्रती वर्षी 6000 रुपये त्यांच्या आधार व डीबीटी संलग्न सक्रीय बँक खात्यात लाभ जमा करण्यात येत आहे.
पंतप्रधानांच्या संकल्पनेतून साकारलेल्या प्रधानमंत्री कृषी सन्मान निधी योजनेत राज्य शासनाच्या अनुदानाची भर घालणारी ‘नमो शेतकरी महासन्मान निधी’ ही योजना अन्नदाता बळीराजाच्या उत्पन्नवाढीसाठी राज्यात सन 2023-24 पासून राज्यात राबविण्यात येत आहे. या योजनेमध्ये पी.एम.किसान योजनेच्या प्रतिवर्ष, प्रतिशेतकरी 6 हजार रुपयाच्या लाभामध्ये महाराष्ट्र शासन आणखी 6 हजार रुपयांची भर घालत आहे. त्यानुसार राज्यातील शेतकऱ्यांना एकंदरीत 12 हजार रुपये प्रतिवर्षी लाभ अदा करण्यात येत आहे.
पंतप्रधान नरेंद्र मोदींच्या हस्ते 26 ऑक्टोबर 2023 रोजी शिर्डी येथून नमो शेतकरी महासन्मान निधी योजनेचा पहिला हप्ता अदा करण्यात आलेला आहे. आज अखेर नमो शेतकरी महासन्मान निधी योजने अंतर्गत एकूण 5 हप्ते वितरीत करण्यात आलेले असून राज्यातील 90.86 लाख शेतकरी कुटुंबांना 8961.31 कोटी रुपयांचा लाभ आधार व डीबीटी संलग्न सक्रीय बँक खात्यात थेट जमा करण्यात आलेला आहे.
पंतप्रधान नरेंद्र मोदींच्या हस्ते डिसेंबर, 2024 ते मार्च, 2025 या कालावधीतील प्रधानमंत्री किसान सन्मान निधी योजनेचा 29 वा हप्ता वितरीत करण्यात आला आहे. या हप्ता वितरण सोहळयामध्ये महाराष्ट्र राज्यातील एकूण 92.89 लाख शेतकरी कुटुंबाना रक्कम 1967.12 कोटी निधीचा लाभ वितरीत करण्यात आलेला आहे. या व्यतिरीक्त त्यानंतरही केंद्र शासनाने पी.एम. किसान योजनेअंतर्गत एकूण 65,047 लाभार्थीना लाभ अदायगीचे नियोजन केले आहे. त्यानुसार राज्यातील 93.26 लाख शेतकरी कुटुंबाच्या नमो शेतकरी महासन्मान निधी योजनेचा सहाव्या हप्त्याचा सुमारे रक्कम 2169 कोटी लाभ आधार व डीबीटी संलग्न सक्रीय बँक खात्यात जमा करण्यात येत आहे.
