जळगाव, 12 मार्च : आंतरराष्ट्रीय स्पर्धेत पदक मिळविणा-या खेळाडूंच्या बक्षिसांच्या रक्कमेत दहा लाखावरून पन्नास लाख म्हणजेच पाचपट वाढ करण्यात आली. खेळाडूंना प्रोत्साहन मिळावे, त्यांची विविध स्पर्धेतील कामगिरी अधिक चांगली होण्यासाठी त्यांना सर्व सोयीसुविधा देण्यासाठी शासन प्रयत्नशील आहे, असे प्रतिपादन क्रीडा व युवक कल्याण मंत्री गिरीष महाजन यांनी केले.
छत्रपती शिवाजी महाराज चषक राज्यस्तरीय कबड्डी स्पर्धेचे काल मोठ्या थाटात क्रीडा व युवक कल्याण मंत्री गिरीष महाजन यांच्या हस्ते उद्घाटन करण्यात आले. क्रीडा व युवक सेवा संचालनालय, पुणे, महाराष्ट्र राज्य तसेच जळगाव जिल्हा कबड्डी असोसिएशन आणि जिल्हा क्रीडा अधिकारी कार्यालय, जळगाव यांच्या संयुक्त विद्यमाने हे आयोजन करण्यात आले आहे. यावेळी ते बोलत होते. स्पर्धेपूर्वी सायंकाळी जिल्हा क्रीडा संकूलापासून ढोल ताशांच्या गजरात खेळाडूंची फेटे बांधून मिरवणूक काढण्यात आली. यावेळी नागरिकांनी मोठा प्रतिसाद दिला. तसेच खेळाडूंची मिरवणूक पाहण्यासाठी रस्त्यांच्या दूर्तफा गर्दी झाली होती.
यावेळी मंत्री गिरीष महाजन काय म्हणाले –
मंत्री गिरीष महाजन म्हणाले की, खेळाचा प्रचार व प्रसार होण्यासाठी विविध जिल्ह्यात राज्यस्तरीय क्रीडा स्पर्धा घेण्यात येत आहेत. शालेय आणि महाविद्यालयीन विद्यार्थ्यांमध्ये खेळाची गोडी निर्माण व्हावी, ही यामागील भूमिका असून राज्यातील खेळाडूंना जगातील विविध देशांतील मार्गदर्शकांचे मार्गदर्शन लाभावे, यासाठी विविध करार (mou) करण्यात आले आहेत. आंतरराष्ट्रीय स्पर्धेत पदक मिळविणाऱ्या खेळाडूंच्या बक्षिसांच्या रक्कमेत 10 लाखांवरून 50 लाख म्हणजेच पाचपट वाढ करण्यात आली. खेळाडूंना प्रोत्साहन मिळावे, त्यांची विविध स्पर्धेतील कामगिरी अधिक चांगली होण्यासाठी त्यांना सर्व सोयीसुविधा देण्यासाठी शासन प्रयत्नशील असल्याचेही त्यांनी यावेळी सांगितले.
यावेळी आमदार सुरेश भोळे, आमदार मंगेश चव्हाण, जळगावचे पोलीस अधीक्षक एम. राजकुमार, धुळ्याचे पोलीस अधीक्षक संजय बारकुंड, जळगाव जिल्हा बँकेचे चेअरमन संजय पवार, नाशिक विभागाच्या क्रीडा उपसंचालक सुनंदा पाटील, कोल्हापूर विभागाचे क्रीडा उपसंचालक संजय सबनीस, जिल्हा क्रीडा अधिकारी मिलींद दिक्षित, शाम कोगटा, नितीन बरडे, प्रदिप तळवेलकर, अशोक चौधरी, शैला पाटील, अंजली पाटील, गणपत पोळ, नारायण अप्पा खडके, राजेंद्र घुगे, आस्वाद पाटील, मंगल पांडे, सचिन भोसले यांच्यासह मान्यवर उपस्थित होते.
कार्यक्रमाच्या प्रास्तविकात नाशिक विभागाच्या क्रीडा उपसंचालक सुनंदा पाटील म्हणाल्या की, छत्रपती शिवाजी महाराज चषक राज्यस्तरीय कबड्डी स्पर्धेच्या आयोजनाचा मान क्रीडामंत्री गिरीश महाजन यांच्यामुळे जळगाव जिल्ह्यास मिळाला आहे. ही जिल्ह्यासाठी गौरवाची बाब आहे. या स्पर्धेत राज्यातील विविध 20 जिल्ह्यातील 16 पुरूष व 16 महिला संघ असे एकूण 32 संघ सहभागी झाले आहेत. या स्पर्धेत एकूण 19 लाख 72 हजाराची रोख बक्षीस देण्यात येणार असून या स्पर्धा 11 ते 14 मार्च, 2023 या कालावधीत सागरपार्क मैदान येथे सुरू राहतील.
या स्पर्धेतील सहभागी संघामध्ये कबड्डी प्रो लीग तसेच विविध राष्ट्रीय क्रीडा स्पर्धांत खेळलेल्या खेळाडूंचा समावेश आहे. प्रत्येक संघातील 12 खेळाडू, 1 क्रीडा मार्गदर्शक व 1 व्यवस्थापक असा एकूण 14 जणांचा समावेश राहील. या स्पर्धेत 384 कबड्डीपट्टू, 100 सरपंच, पंच व पदाधिकारी, अधिकारी तसेच 50 स्वयंसेवक व समिती सदस्य असे एकूण 550 जण सहभागी होत आहेत.
या स्पर्धेसाठी सागरपार्क मैदानावर चार कबड्डीचे मैदान तयार करण्यात आले आहे. या स्पर्धेत अंतिम विजेत्या संघाला 1 लाख 50 हजार रुपयांचे तर उपविजेत्या संघाला 1 लाख रुपयांचे पारितोषिक देण्यात येणार आहे. याशिवाय सहभागी व इतर संघानाही बक्षिसे देण्यात येणार आहे. या स्पर्धेसाठी आलेल्या खेळाडू व इतर यांची भोजन, निवास, प्रवास खर्च देण्यात येणार असून 5 हजार प्रेक्षकांसाठी सागरपार्क मैदानावर प्रेक्षक गॅलरी उभारण्यात आली आहे, असेही यांनी सांगितले.
कबड्डीप्रेमी नागरिकांची मोठ्या प्रमाणात गर्दी –
स्पर्धेच्या आयोजनासाठी जळगाव शहर महानगरपालिका, जळगाव जिल्हा कबड्डी असोसिएशन तसेच स्थानिक पदाधिकारी व लोकप्रतिनिधी यांचे सहकार्य लाभत आहे. स्पर्धेची सुरूवात मान्यवरांच्या हस्ते ध्वजवंदन व छत्रपती शिवाजी महाराज यांच्या पुतळ्याचे पुजन करून करण्यात आली. त्यानंतर जळगाव पोलीस दलाच्या बॅन्ड पथकाच्या तालावर सर्व सहभागी संघाचे संचलन पार पडले. शाहिर विनोद ढगे यांच्या पथकाने महाराष्ट्र राज्यगीत सादर केले. त्यानंतर विविध सांस्कृतिक कार्यक्रम सादर झाले. स्पर्धा बघण्यासाठी कबड्डीप्रेमी नागरिकांनी मोठ्या प्रमाणात गर्दी केली होती.
