हैदराबाद, 13 डिसेंबर : हैद्राबादमधील संध्या थिएटरमध्ये पुष्पा 2 चित्रपटाच्या प्रीमिअर शोवेळी चेंगराचेंगरी होऊन एका महिलेचा मृत्यू झाला होता. याप्रकरणी अल्लू अर्जुनवर गुन्हा दाखल करण्यात आला होता. आज अल्लू अर्जुनला सेशन कोर्टने 14 दिवसांची न्यायालयीन कोठडी सुनावली होती. दरम्यान, त्याने तेलंगणा उच्च न्यायालयात जामीनासाठी अर्ज केल्यानंतर न्यायालयाने आता त्याचा अंतरिम जामीन मंजूर केला.
नेमकं काय घडलं? –
हैद्राबादच्या संध्या थिएटरमध्ये 4 डिसेंबर रोजी पुष्पा 2 चित्रपटाचा प्रीमिअर शो आयोजित करण्यात आला होता. त्यावेळी अल्लू अर्जुनने पोलीस प्रशासनाना माहिती न देता उपस्थित लावली होती. अल्लू अर्जुनला पाहण्यासाठी चाहत्यांची एकच गर्दी झाल्याचे पाहायला मिळाले. दरम्यान, अचानक झालेल्या गर्दीचे व्यवस्थापन त्या चित्रपट व्यवस्थापकांना करता न आल्याने त्या ठिकाणी चेंगराचेंगरी झाली आणि त्यामध्ये एका महिलेचा मृत्यू झाला.
पोलिसांनी घेतलं होतं ताब्यात –
हैद्राबादमधील 4 डिसेंबर रोजी घडलेल्या या घटनेनंतर त्या महिलेच्या कुटुंबीयांनी अल्लू अर्जुन आणि संध्या थिएट मालकाच्या विरोधात गुन्हा नोंद केला. याप्रकरणी आज त्याला पोलिसांनी ताब्यात घेतल आणि हैदराबादमधील चिक्कडपल्ली पोलीस ठाण्यात हलवण्यात आले होते. यानंतर अल्लू अर्जुनला हैद्राबाद चेंगराचेंगरी प्रकरणी 14 दिवसांची न्यायालयीन कोठडी सुनावण्यात आली होती.
अल्लू अर्जुनला 4 आठवड्यांचा अंतरिम जामीन मंजूर –
दरम्यान, हैदराबाद पोलिसांनी दाखल केलेला खटला रद्द करण्यासाठी अल्लू अर्जुनने तेलंगणा उच्च न्यायालयात धाव घेतली. तेलंगणा उच्च न्यायालयाने अल्लू अर्जुनला चार आठवड्यांसाठी अंतरिम जामीन मंजूर केला आहे. तसेच न्यायालयाने अभिनेत्याला 50 हजार रुपयांचा पर्सनल बाँड सादर करण्याचे देखील आदेश दिले आहेत. दरम्यान, हायकोर्टाने मृत महिलेच्या कुटुंबाप्रती सहानुभूती व्यक्त करत अटक करण्यात आलेल्या लोकांना याप्रकरणी दोषी धरता येईल का, असा सवालही न्यायालयाने उपस्थित केला आहे.
