गोंदिया, 29 नोव्हेंबर : गोंदिया जिल्ह्यातील अर्जुनी ते गोंदिया रोडवर शिवशाही बसचा अपघात झाल्याची धक्कादायक बातमी समोर आली आहे. या अपघातात शिवशाही बस उलटल्याने दहा जणांचा मृत्यू झाल्याची धक्कादायक घटना घडली. तर या 30 ते 35 जण जखमी झाले असून जखमींना गोंदिया येथील शासकीय वैद्यकीय महाविद्यालयात दाखल करण्यात आले आहे. आज दुपारी दुपारी साडे बारा वाजेच्या सुमारास गोंदिया-कोहमारा मार्गावरील डव्वा जवळ ही अपघाताची घटना घडली.
काय आहे संपुर्ण बातमी? –
मिळालेल्या माहितीनुसार, भंडारा-गोंदिया ही शिवशाही बस क्र. एम.एच.09, एम 1273 आज शुक्रवारी 29 नोव्हेंबर रोजी दुपारी भंडाऱ्याहून गोंदियाकडे येथे होती. बस चालकाने एका दुचाकीला ओव्हरटेक करताना डव्वा जवळ बस उलटून जवळपास 20 फूट रस्त्यापासून घासत गेली. त्यामुळे बस उलटल्याने 12 प्रवाश्यांचा मृत्यू झाला तर 30 ते 35 प्रवासी जखमी झाले आहेत. गंभीर जखमी असलेल्या प्रवाशांची संख्या अधिक असल्याने यात मृतांचा आकडा वाढण्याची देखील शक्यता वर्तविली जात आहे. दरम्यान, हा अपघात इतका भीषण होता की बसच्या काचा फुटल्या आणि आत असलेले प्रवासी हे खिडकीच्या बाहेर फेकले गेल्याची माहिती समोर आली आहे.
मृतांच्या कुटुंबियांना 10 लाखांची मदत –
गोंदिया शिवशाही बस अपघाताची माहिती मिळताच बचाव पथकांनी तातडीने घटनास्थळी धाव घेत बचाव कार्य सुरु केले. दरम्यान, गोंदियामध्ये झालेल्या भीषण एसटी अपघातानंतर राज्याचे काळजीवाहू मुख्यमंत्री एकनाथ शिंदेंनी मृतांच्या कुटुंबियांना तातडीने 10 लाख रुपये मदत म्हणून देण्याचे आदेश परिवहन प्रशासनाला दिले आहेत.
देवेंद्र फडणवीस यांची एक्सवर पोस्ट –
देवेंद्र फडणवीस यांनी एक्स या सोशल मीडिया प्लॅटफॉर्मवर गोंदिया अपघाताबाबत सांगितले की, गोंदिया जिल्ह्यातील सडकअर्जुनीनजीक शिवशाही बसचा दुर्दैवी अपघात होऊन काही प्रवाशांचा मृत्यू झाल्याची घटना अतिशय दुर्दैवी आहे. मृतांना मी भावपूर्ण श्रद्धांजली अर्पण करतो. त्यांच्या कुटुंबीयांच्या दु:खात आम्ही सहभागी आहोत. या घटनेत जे लोक जखमी झाले, त्यांना खाजगी रुग्णालयात उपचार द्यावे लागले तरी ते तातडीने द्या, असे निर्देश देण्यात आले आहेत.
आवश्यकता भासल्यास त्यांना नागपूरला हलविण्याची व्यवस्था करा, असेही मी गोंदियाच्या जिल्हाधिकार्यांना सांगितले आहे. प्रशासनातील वरिष्ठ अधिकारी घटनास्थळी पोहोचले असून, ते मदतकार्यासाठी समन्वय करीत आहेत. या घटनेतील जखमींना लवकर आराम पडावा, अशी मी ईश्वरचरणी प्रार्थना करतो, असे देवेंद्र फडणवीस यांनी म्हटले आहे.
हेही वाचा : “त्यांना जे हवंय ते…..”, अमित शहा यांच्यासोबतच्या भेटीनंतर संजय राऊत यांचा एकनाथ शिंदे-अजित पवार यांना टोला
