मुंबई, 4 नोव्हेंबर : राज्यात विधानसभा निवडणुकीची धामधूम सुरू असतानाच मोठी बातमी सोर आली आहे. राज्याच्या पोलीस महासंचालक पदावर असलेल्या रश्मी शुक्ला यांची अखेर बदली झाली आहे. काँग्रेस तसेच महाविकास आघाडीने रश्मी शुक्ला यांच्या बदलीसाठी सातत्याने मागणी लावून धरली होती. दरम्यान, रश्मी शुक्ला यांना पोलीस महासंचालक पदावरुन हटवण्याचे आदेश केंद्रीय निवडणूक आयोगाने काढले आहेत.
काँग्रेसने केला होता आरोप –
रश्मी शुक्ला यांची सेवा जून 2024 रोजी समाप्त झाली. असे असतानाही भाजप, युती सरकारने जानेवारी 2026 पर्यंत त्यांना नियमबाह्य बढती दिली होती, असा आरोप काँग्रेस प्रदेशाध्यक्ष नाना पटोले यांनी केला होता. तसेच रश्मी शुक्ला यांची कार्यपद्धती अत्यंत वादग्रस्त राहिली असून नियमबाह्य कामे करणे तसेच विरोधी पक्षांतील नेत्यांना धमकावण्याची कामे त्यांनी केली आहेत, असा देखील आरोप नाना पटोले यांनी केला होता.
केंद्रीय निवडणूक आयोगाचे आदेश –
नाना पटोले तसेच काँग्रेसच्या या आक्षेपानंतर आता भारतीय निवडणूक आयोगाने मोठा निर्णय घेतला असून रश्मी शुक्ला यांची बदली करण्याचा आदेश आयोगाने दिले आहेत. विरोधी बाकावरील महाविकास आघाडीच्या आक्षेपांनंतर निवडणूक आयोगाने तत्काळ प्रभावाने रश्मी शुक्ला यांची बदली करावी, असा आदेश दिलाय. रश्मी शुक्ला यांची बदली करून पोलीस महासंचालकपदाचा कार्यभार शुक्ला यांच्यानंतरच्या सर्वांत वरिष्ठ आयपीएस अधिकाऱ्याकडे सोपवावा, असे देखील निर्देश निवडणूक आयोगाने राज्याच्या मुख्य सचिवांना दिले आहेत.
मुंबईचे पोलीस आयुक्त विवेक फणसाळकर यांच्याकडे अतिरिक्त कार्यभार –
केंद्रीय निवडणूक आयोगाने रश्मी शुक्ला यांना पोलीस महासंचालक पदावरुन हटविण्याचे आदेश दिले. तसेच उद्या (5 नोव्हेंबर) दुपारी 1 वाजेपर्यंत तीन वरिष्ठ पोलीस अधिकाऱ्याची नावे राज्याच्या प्रशासनाने केंद्रीय निवडणूक आयुक्तांना पाठवायचे आहेत. त्याआधी मुंबईचे पोलीस आयुक्त विवेक फणसाळकर यांच्यावर राज्याच्या पोलीस महासंचालकपदाचा अतिरिक्त कार्यभार सोपवण्यात आल्याची माहिती समोर आली आहे.
रश्मी शुक्ला कोण आहेत?
रश्मी शुक्ला या 1988 च्या बॅचच्या IPS अधिकारी आहेत. त्या महाराष्ट्र पोलिसातील सर्वात वरिष्ठ IPS अधिकार्‍यांपैकी एक आहेत. याआधी त्यांनी सशस्त्र सीमा बल (SSB) चे केंद्रप्रमुख म्हणूनही जबाबदारी पार पाडलेली आहे. त्याशिवाय पुणे पोलीस आयुक्त म्हणूनही त्यांनी काम केलेले आहे. महाविकास आघाडी सरकारच्या काळात रश्मी शुक्ला यांचे नाव राज्यातल्या फोन टॅपिंग प्रकरणामध्ये चर्चेत आले होते.
हेही वाचा : Breaking : मनोज जरांगे यांची विधानसभा निवडणुकीतून माघार, नेमका काय घेतला निर्णय?
