बंगळुरू : नवरा बायकोच्या वादाच्या अनेक घटना समोर येत असतात. यामध्ये काही वाद हे थेट न्यायालयातही जातात. घटस्फोटानंतर पत्नीला पोटगीही द्यावी लागते. मात्र, काही वेळी पत्नीची मागणी ही अशी असते की अनेकांना धक्का बसतो. अशीच एक धक्कादायक घटना समोर आली आहे. एका प्रकरणामध्ये पत्नीने आपल्या नवऱ्याकडे प्रत्येक महिन्याला तब्बल 6 लाख रुपयांच्या पोटगीची मागणी केली आहे.
न्यायाधीशांनाही बसला धक्का –
विशेष म्हणजे पोटगीची ही रक्कम ऐकल्यानंतर न्यायाधीशांनाही धक्का बसला आहे. तसेच एकट्या महिलेसाठी इतके पैसे कोण खर्च करते, असे म्हणत महिलेला इतकी पोटगी हवी असेल तर महिलेने स्वतः पैसे कमवावे, या शब्दात सुनावले आहे.
काय आहे घटना?
हे प्रकरण बंगळुरू उच्च न्यायालयामधील आहे. मागच्या वर्षी राधा मुनुकुंत यांनी कर्नाटकातील बंगळुरू कौटुंबिक न्यायालयात अपील केले होते. यावेळी बंगळुरू कौटुंबिक न्यायालयाच्या मुख्य न्यायमूर्तीनी महिलेचे पती एम. नरसिम्हा यांना 50 हजार रुपये मासिक पोटगी द्यावी, असे आदेश दिले होते. मात्र, आपल्याला हा आदेश मान्य नाही असे सांगत महिलेने उच्च न्यायालयात धाव घेतली होती.
6 लाख रुपयांची पोटगी नेमकी कशासाठी –
महिलेच्या वकिलांनी आपल्या अशिलाला तिच्या पतीकडून 6 लाख रुपये मासिक देखभाल भत्ता मिळावा, यासाठी युक्तिवाद केला. यामध्ये वकिलांने सांगितले की, महिलेला शूज, कपडे या सर्व वस्तूंसाठी प्रत्येक महिन्याला 15 हजार रुपये लागतात. तसेच जेवणासाठी 60 हजार रुपये लागतात. इतकेच नव्हे तर महिलेला पाय आणि गुडघेदुखीचा त्रास होत असल्याने फिजिओथेरपी आणि इतर औषधांचा 4 ते 5 लाख रुपयांचा खर्च येत असल्याचे महिलेच्या वकिलाने म्हटले.
न्यायालयाने काय म्हटले?
महिलेच्या या मागणीवर न्यायालयाने महिलेला चांगलेच फटकारले. तसेच म्हटले की, 6 लाख 13 हजार 300 रुपये मागणी करणे, ही सामान्य बाब आहे, हे तुम्ही न्यायालयाला सांगू नका. या महिलेवर कुटुंबाची कोणतीही जबाबदारी नाही. त्यामुळे एकट्या महिलेसाठी इतका पैसा कोण खर्च करते?, या शब्दात न्यायालयाने महिलेला सुनावले. तसेच मुलांची काळजीही तुम्हाला घ्यायची नाही. तुम्ही संवेदनशील असायला हवे. योग्य रकमेची मागणी केली नाही तर ही याचिकाही फेटाळली जाईल, असेही न्यायाधीशांनी सुनावले.
