ईसा तडवी, प्रतिनिधी
पाचोरा, 15 मे : रामदेवावाडी येथील अपघाताची घटना ताजी असतानाच पाचोरा येथील जारगाव चौफलीवर जळगावकडे जाताना ट्रक आणि मोटरसायकल यामध्ये अपघात झाल्याची धक्कादायक घटना आज दुपारी घडली. या अपघातात पती समोर पत्नी जागीच ठार झाली. दरम्यान, याप्रकरणी ट्रक चालकाविरूद्ध गुन्हा दाखल करण्यात आला आहे.
काय आहे संपूर्ण बातमी? –
मिळालेल्या माहितीनुसार, भडगाव तालुक्यातील गिरड येथील शेख इस्माईल, अब्दुलनबी मणियार हे आपली पत्नी सना शेख इस्माईल मणियार (वय – २६ वर्ष) यांची प्रकृती खराब असल्याने त्यांना पाचोऱ्यातील जारगाव चौफुली खाजगी रुग्णालयात प्रकृती दाखविण्यासाठी 15 मे रोजी सकाळी मोटरसायकलवरून निघाले होते. दरम्यान, जारगाव चौफलीजवळ शेख इस्माईल मणियार हे आपली मोटरसायकल चालवित असताना रस्त्यावर एक ट्रक रिव्हर्स येत होती. यामध्ये त्या ट्रकच्या चाकाखाली सना शेख इस्माईल मणियार ह्या सापडल्याने त्यांचा जागेवरच दुर्दैवी मृत्यू झाला.
ट्रक चालकाविरूद्ध गुन्हा दाखल –
शेख इस्माईल मणियार यांचेसह त्यांच्या आई शानुरबी अब्दुलनबी मणियार व 4 वर्षीय महिरा शेख इस्माईल मणियार हे गंभीर जखमी जखमी झाले आहेत. त्यांचेवर पाचोरा येथील खाजगी रुग्णालयात उपचार सुरू आहेत. दरम्यान, याप्रकरणी पाचोरा पोलिसांत ट्रक चालकाविरूद्ध गुन्हा दाखल करण्यात आला आहे. घटनेची माहिती मिळताच काँग्रेसचे पाचोरा तालुका अध्यक्ष सचिन सोमवंशी, इरफान मणियार, लतीफ शेख राष्ट्रवादी काँग्रेस पार्टीचे अझर खान, हे घटनास्थळी दाखल होवून त्यांनी मयत सना शेख इस्माईल मणियार व जखमींना तातडीने रुग्णालयात दाखल केले.
प्रशासनाच्या कारवाईकडे सर्वांचे लक्ष –
जारगाव चौफलीवर दिवसा मोठ्या प्रमाणात वाहनांची वर्दळ असते. त्याठिकाणी बेशिस्त वाहतुक व अतिक्रमण वाढल्याचे दिसून येते. याकडे प्रशासनाचे दुर्लक्ष होत असल्याचा आरोप केला जात आहे. दरम्यान, यावर पाचोरा पोलीस कारवाई करणार का, याकडे सर्वांचे लक्ष लागले आहे.
हेही वाचा : Karan Pawar Interview : शिवसेना (उबाठा) उमेदवार करण पवार यांच्यासोबत विशेष संवाद.
