ईसा तडवी, प्रतिनिधी
पाचोरा, 9 सप्टेंबर : पाचोरा शहरातून धक्कादायक बातमी समोर आली आहे. पाचोरा शहरातील पोलीस स्टेशनजवळील परिसरात झेरॉक्स व्यावसायिकाने गळफास घेत आत्महत्या केली. परभतसिंग केशरसिंग राजपूत (वय 52 वर्ष, रा. पांडवनगरी, पाचोरा) असे मयताचे नाव आहे. दरम्यान, यांनी आत्महत्या का केली याचे कारण अजून अस्पष्ठ झालेले नसून पोलीस पुढील तपास करत आहेत.
काय आहे संपुर्ण बातमी? –
मिळालेल्या माहितीनुसार, परभतसिंग राजपूत हे नेहमीप्रमाणे काल 8 सप्टेंबर रविवार रोजी त्यांच्या झेरॉक्स दुकानात आले. रविवार हा सुटीचा दिवस असल्याने त्यांच्या दुकानावर येणारी ग्राहकांची वर्दळ देखील कमी होती. असे असताना परभतसिंग हे गळफास घेतलेल्या अवस्थेत आढळून आले. यानंतर त्यांना ग्रामीण रूग्णालयात दाखल केले असता डॉक्टरांनी त्यांना मृत घोषित केले.
परभतसिंग केशरसिंग राजपूत यांच्या पश्चात आई, वडिल, पत्नी, दोन मुले असा परिवार आहे. त्यांनी उचलेल्या टोकाच्या पावलामुळे कुटुंबियांना मोठा धक्का बसलाय. दरम्यान, त्यांच्या आत्महत्येचे कारण अद्याप समजू शकले नाही. याबाबत पाचोरा पोलिसांत अकस्मात मृत्यूची नोंद करण्यात आली असून पुढील तपास पवन पाटील करत आहेत.
हेही वाचा : Video : ओळख प्रशासनाची; प्रांताधिकारी पदाच्या जबाबदाऱ्या काय, त्यांचं कामकाज कसं चालतं?
