ईसा तडवी, प्रतिनिधी
सातगाव डोंगरी (पाचोरा), 13 मार्च : सातगाव डोंगरी येथे 10 मार्च रोजी सायंकाळी 7.30 वाजेच्या सुमारास झालेल्या मारहाणीत सातगाव तांडा येथील तरूणाचा मृत्यू झाल्याची धक्कादायक घटना समोर आली आहे. पोपट ओंकार राठोड (वय 22) असे मृत झालेल्या तरूणाचे नाव आहे. दरम्यान, याप्रकरणातील आरोपी राहुल अल्हाट (वय 25) याविरोधात पिंपळगाव पोलिस स्टेशनमध्ये गुन्हा दाखल करण्यात आला असून त्याला अटक करण्यात आली आहे.
काय आहे संपूर्ण बातमी? –
पोपटचे काका आणि राहुल अल्हाट यांच्या दोघांत दोन वर्षांपूर्वी वाद झाला होते. 10 मार्च रोजी पोपट हा बस स्टॉपवर उभा असताना राहुल अल्हाट याच्यासोबत वाद झाला. पोपट हा काकाच्यावतीने मध्यस्थी करत असल्याचा राग राहुलच्या मनात होता. दरम्यान, राहुलने पोपट राठोड यास चापटा बुक्क्यांनी तसेच डोक्यात हातातील कड्याने मारहाण केल्याने त्याला जबर मार लागला. दरम्यान, पोपट तसाच मोटरसायकलवर तांड्याकडे निघाला मात्र रस्त्यातच अस्वस्थ वाटू लागल्याने गाडी उभी करून जमिनीवर झोपला आणि त्यातच त्याचा प्राण गेला.
आरोपीला पोलिसांनी केली अटक –
याप्रकरणी राहुल अल्हाट याच्याविरोधात पिंपळगाव (हरे) पोलिस स्टेशनमध्ये गुन्हा दाखल करण्यात आला असून त्याल अटक करण्यात आली आहे. पुढील तपास पोलीस अधीक्षक एम.सि.व्ही. महेश्वर रेड्डी, अपर पोलीस अधीक्षक कविता नेरकर- पवार, उपविभागीय पोलीस अधिकारी धनंजय येरुळे यांच्या मार्गदर्शनाखाली सपोनि प्रकाश काळे हे करीत आहेत.
हेही वाचा : पारोळा तालुक्यातील 4 संशयितांना नाशिक गुन्हे शाखेच्या पोलिसांनी केली अटक, नेमकं काय प्रकरण?
