इसा तडवी, प्रतिनिधी
पाचोरा, 19 ऑक्टोबर : राज्यात दिवसेंदिवस गुन्हेगारीच्या घटनांमध्ये वाढ होत आहे. अनैतिक संबंधांतून खून, आत्महत्या, तसेच बलात्काराच्या घटना समोर येत आहे. इतकेच नव्हे तर आर्थिक फसवणूक आणि चोरीच्याही घटना समोर येत आहेत. यातच आता जळगाव जिल्ह्यातील पाचोरा तालुक्यातून एक धक्कादायक घटना समोर आली आहे.
पाचोरा शहरातील एका घरातून तब्बल 10 लाख रुपयांची चोरी झाल्याची धक्कादायक घटना समोर आली आहे. या घटनेनंतर तालुक्यात एकच खळबळ उडाली आहे.
काय आहे संपूर्ण घटना –
पोलिसांनी दिलेल्या माहितीनुसार, पाचोरा शहरातील रंगार गल्ली परिसरातील एका घरात तब्बल 10 लाख रुपयांची चोरी झाली. ही चोरी हरिओम चतुर्भुज मोर या व्यक्तीच्या घरी झाली. अज्ञात चोरट्याने बेडखाली ठेवलेली चावी काढून कपाटातून तब्बल 10 लाख रुपयांची रोकड लंपास करत घटना स्थळावरुन पोबारा केला. चोरीची ही घटना 17 ऑक्टोबर रोजी सकाळी 10 ते सायंकाळी 7 वाजेच्या दरम्यान घडली, अशी माहिती पाचोरा पोलीस स्टेशनचे पोलीस अधिकारी योगेश गणगे पाटील यांनी सुवर्ण खान्देश लाईव्ह न्यूजशी बोलताना दिली.
घटनेने मोठी खळबळ –
या घटनेनंतर हरिओम चतुर्भुज मोर यांच्या फिर्यादीवरुन पाचोरा पोलीस ठाण्यात अज्ञात व्यक्तीविरोधात गुन्हा दाखल करण्यात आला आहे. तसेच या प्रकरणाचा पुढील तपास पोलीस अधिकारी योगेश गणगे पाटील हे करीत आहे. दरम्यान, पाचोरा तालुक्यात झालेल्या तब्बल 10 लाख रुपयांच्या चोरीच्या घटनेनंतर परिसरात मोठी खळबळ उडाली आहे.
