जळगाव, 11 मार्च : जळगाव जिल्ह्यातून दुःखद घटना समोर आली आहे. शेतातून चारा घेवून येत असताना शेताच्या बंधाऱ्यावरून बैलगाडी जात असताना अचानक बैलगाडी उलटी झाल्याने 13 वर्षीय मुलाचा जागीच मृत्यू झाला आहे. जळगाव तालुक्यातील वाकडी गावाजवळ आज दुपारी ही घटना घडली. गौरव आनंदा पाटील (रा. वाकडी) असे सातवीत शिकणाऱ्या मृत मुलाचे नाव आहे.
काय आहे संपूर्ण बातमी? –
गौरव पाटील हा सोमवारी दुपारी चारा आणण्यासाठी शेतात बैलगाडीने गेला. शेतातून चारा घेवून येत असताना शेताच्या बंधाऱ्यावरून बैलगाडी जात असताना अचानक बैलगाडी उलटी झाली. यात बैलगाडीच्या कठड्याखाली गौरव दाबला गेला. दरम्यान, बैलांनी झटका दिल्याने लाकडी दुस्सर तुटली आणि लोखंडी कठड्याला लावलेला लोखंडी विळा गौरवच्या डोक्यात घुसल्याने त्याचा जागीच मृत्यू झाला.याप्रकरणी एमआयडीसी पोलिसात अकस्मात मृत्यूची नोंद करण्यात आली आहे.
शेतातजवळ असलेल्या काही शेतकऱ्यांनी घटनास्थळी धाव घेवून त्याला तातडीने जिल्हा रुग्णालयात दाखल केले. याठिकाणी वैद्यकीय अधिकाऱ्यांनी त्याला तपासून मृत घोषित केले. यावेळी मुलाच्या कुटुंबीयांनी रुग्णालयात मोठा आक्रोश केला.
हेही वाचा : धक्कादायक! पारोळा येथे 16 वर्षीय मुलीची आत्महत्या, काय आहे संपूर्ण बातमी?
