जळगाव, 29 ऑगस्ट : जळगाव शहरात अचानकपणे इमारत कोसळल्याची धक्कादायक घटना घडली आहे. प्रशासनाच्या मदतीमुळे इमारतीखाली दबल्या गेलेल्या 70 वर्षीय वृद्ध महिलेचा मृत्यू झाला आहे. तर इतर तिघांना वाचविण्यात प्रशासनानाला यश आले आहे.
काय आहे संपूर्ण घटना –
जळगाव शहरातील शिवाजी महाराज नगरातील मस्जिद समोर असलेली एक तीन मजली जुनी इमारत आज सकाळी ८.३० वाजेच्या सुमारास अचानक कोसळली. यात एकूण चार जण या इमारती खाली दबले गेले होते. इमारतीखाली दबलेल्यांना वाचविण्यासाठी प्रशासनाने तत्काळ मदत कार्य हाती घेतल्यामुळे दबलेल्यांपैकी तीन जणांना वाचविण्यात यश आले. मात्र, एक 75 वर्षे महिला या इमारतीखाली दबली गेली होती. दरम्यान, पाच तासांच्या बचाव कार्यानंतर 70 वर्षीय वृद्ध महिला मृतावस्थेत आढळून आली आहे.
जळगाव शहरातील शिवाजी नगरात 74 वर्ष जुनी इमारत पाठक यांची ही इमारत आहे. या इमारतीमध्ये ते राहत नसल्याची माहिती समोर आली आहे. या इमारतीचे मालक पाठक कुटुंबीय कधीतरी या ठिकाणी पूजा करण्यासाठी तसेच पाणी भरण्यासाठी येतात. त्यानुसार या ठिकाणी आज पाठक कुटुंबीय पाणी भरण्यासाठी तसेच पूजा करण्यासाठी आले होते. याच दरम्यान सकाळी साडेआठ वाजता अचानक ही तीन मजली इमारत कोसळली.
घटनेची माहिती मिळाल्यानंतर तातडीने महापालिकेचे कर्मचारी या ठिकाणी पोहोचले व बचाव कार्य सुरू केले. यात तीन जणांना वाचविण्यात यश आले. तर गेल्या पाच तासापासून ढिगाऱ्याखाली अडकलेल्या वृद्ध महिलेचा शोध सुरू होता. अखेर, पाच तासानंतर वृद्ध महिलेला मृत अवस्थेत ढिगाऱ्याखालून काढण्यात आले आहे. वृद्धादीचा मृतदेह बघितल्यावर वृद्धाच्या कुटुंबीयांनी एकच हंबरडा फोडला. तर जिल्हा रुग्णालयात परिसरात नातेवाईकांसह जळगावकरांची मोठी गर्दी पहावयास मिळाली.
पालकमंत्र्यांची घटनास्थळी भेट –
जळगाव जिल्ह्याचे पालकमंत्री गुलाबराव पाटील यांनीही इमारत कोसळल्याच्या घटनेच्या ठिकाणी भेट दिली. या ठिकाणी मंत्री गुलाबराव पाटील यांनी भेट देत घटनेविषयी अधिकाऱ्यांकडून माहिती घेतली. या ठिकाणी इमारतीचे मालक कुटुंबियांची ही मंत्री गुलाबराव पाटील यांनी भेट घेत त्यांना धीर दिला.
