मुंबई, 16 ऑक्टोबर : केंद्रीय निवडणूक आयोगाने महाराष्ट्र विधानसभा निवडणुकीचा कार्यक्रम जाहीर केलाय. असे असताना राज्यात राजकीय घडामोडींना वेग आला असताना मोठी बातमी समोर आली आहे. एकीकडे महायुतीचे जागावाटप जाहीर झाले नाहीये तर दुसरीकडे जागावाटपाआधीच महायुतीला मोठा धक्का बसलाय. राष्ट्रीय समाजसेवा पक्षाचे नेते महादेव जानकर यांनी लोकसभेला महायुतीसोबत असलेले महादेव जानकर यांनी आता महायुतीतून बाहेर पडण्याचा निर्णय घेतला आहे.
महादेव जानकर यांचा महायुतीतून बाहेर पडण्याचा निर्णय –
राष्ट्रीय समाज पक्षाचे नेते महादेव जानकर यांनी महायुतीतून बाहेर पडण्याची घोषणा केलीय. तर महादेव जानकर यांचा पक्ष आता राज्यात स्वबळावर निवडणूक लढवणार आहे. महायुतीतील जागावाटपावरून जानकर नाराज असल्याच्या चर्चा रंगल्या होत्या. त्यांनतर त्यांनी हा मोठा निर्णय घेतलाय. परंतु महादेव जानकरांच्या या निर्णयामुळे महायुतीला मात्र मोठा धक्का बसल्याचे सांगितले जात आहे. दरम्यान, आता भाजप आणि महायुतीकडून जानकरांची नाराजी दूर केली जाणार का हे पाहावे लागेल.
बाहेर पडल्यानंतर महादेव जानकर यांची प्रतिक्रिया –
महादेव जानकर म्हणाले की, लोकसभेला महायुतीने आम्हाला एक जागा दिली होती. मात्र, आमचा पक्ष मोठा झाला पाहिजे. तसेच आमच्या पक्षाचा मुख्यमंत्री झाला पाहिजे, यासाठी आम्ही तयारी करत आहोत. राज्यातील 200 मतदारसंघामध्ये प्रत्येक जागेसाठी तीन-तीन अर्ज आलेले आहेत. आता फक्त 88 जागा राहिल्या असून काही ठिकाणी आम्ही विजयी होऊ, काही ठिकाणी दोन नंबरची मते घेऊ. तसेच काही ठिकाणी 10 हजारांपेक्षा जास्त मते घेऊ, असेही जानकर यांनी सांगितले आहे.
हेही वाचा : महायुतीची संयुक्त पत्रकार परिषद, मुख्यमंत्री-उपमुख्यमंत्र्यांनी रिपोर्ट कार्ड केले सादर
