जळगाव, 26 सप्टेंबर: राज्यात दुष्काळाची गंभीर परिस्थिती निर्माण झाली असून, दुष्काळाचा जीआर निघालाच आहे. नुकसानग्रस्त भागात तातडीने पंचनामे करण्याचे काम सुरू असून, पंचनामे पूर्ण झाल्यानंतर शेतकऱ्यांना तातडीने नुकसानभरपाई दिली जाणार आहे. मंत्री, खासदार, आमदार तसेच अधिकारी प्रत्यक्ष शेतकऱ्यांच्या बांधावर जाऊन परिस्थितीची पाहणी करीत असल्याची माहिती राज्याचे आपत्ती व्यवस्थापन मंत्री गिरीश महाजन यांनी दिली.
मंत्री गिरीश महाजन काय म्हणाले? –
जळगावात गणपती विसर्जन मिरवणुकीच्या प्रसंगी 25 सप्टेंबर रोजी पत्रकारांशी बोलताना मंत्री महाजन यांनी राज्यातील दुष्काळी परिस्थितीवर भाष्य केले. राज्यात दुष्काळाचे मोठे सावट आहे. मात्र, शेतकऱ्यांनी काळजी करू नये. शासन त्यांच्या पाठीशी खंबीरपणे उभे आहे, असे त्यांनी सांगितले. या संकटाचा सामना करण्यासाठी शासनाच्या माध्यमातून आवश्यक त्या सर्व उपाययोजना केल्या जातील, असेही महाजन यांनी स्पष्ट केले.
‘शेतकऱ्यांसमोर गंभीर संकट’ –
मंत्री गिरीश महाजन पुढे म्हणाले, अल निनोच्या प्रभावामुळे यंदा राज्यात पावसाचे आगमन सुमारे महिनाभर उशिराने झाले. त्यानंतर पेरण्या पार पडल्या. मात्र, पेरणीनंतर साधारण ४० ते ४५ दिवसांचा पावसाचा खंड पडल्याने अनेक भागांतील पिकांचे मोठ्या प्रमाणावर नुकसान झाले. त्यामुळे शेतकऱ्यांसमोर गंभीर संकट निर्माण झाले आहे.
दरम्यान, पावसाच्या खंडामुळे केवळ पिकांवरच परिणाम झाला नसून, आगामी काळात पिण्याच्या पाण्यासोबतच चाऱ्याची टंचाईही जाणवण्याची शक्यता आहे. त्यामुळे भविष्यात निर्माण होणाऱ्या या परिस्थितीचा विचार करून शासनाच्या माध्यमातून आवश्यक नियोजन करण्यात येईल. पिण्याचे पाणी, चारा तसेच इतर आवश्यक बाबींची व्यवस्था शासनाकडून केली जाईल, असे मंत्री महाजन यांनी सांगितले.
‘शासन शेतकऱ्यांच्या पाठीशी खंबीरपणे उभे’ –
शेतकऱ्यांनी कोणतीही काळजी करू नये. मुख्यमंत्री देवेंद्र फडणवीस, उपमुख्यमंत्री एकनाथ शिंदे तसेच सुनेत्राताई पवार यांच्या नेतृत्वाखाली शासन शेतकऱ्यांच्या पाठीशी खंबीरपणे उभे आहे, असे महाजन यांनी स्पष्ट केले. महाराष्ट्रावर आलेली ही परिस्थिती मानवनिर्मित नसून नैसर्गिक आपत्ती आहे. या संकटाचा सामना शासन, प्रशासन आणि नागरिकांनी एकत्रितपणे करणे आवश्यक आहे. आलेली आपत्ती आपण सर्व मिळून सामोरे जाऊ, असा विश्वासही महाजन यांनी व्यक्त केला.
गणेशोत्सवाला अद्याप एक महिन्याचा कालावधी बाकी आहे. यापूर्वीही अनेकदा गणेशोत्सव आणि दुर्गोत्सवाच्या काळात राज्यात चांगला पाऊस झाला आहे. त्यामुळे येत्या एक ते दीड महिन्यात आणखी चांगला पाऊस पडून नदी-नाले तसेच धरणे भरावीत, पिण्याच्या पाण्याचा प्रश्न मिटावा आणि आगामी रब्बी हंगामात शेतकऱ्यांची पिके चांगली यावीत, अशी प्रार्थना गणरायाच्या चरणी करूया, असे महाजन यांनी म्हटले.
हेही वाचा: पाचोरा-भडगाव मतदारसंघ दुष्काळी जाहीर करण्यासाठी प्रयत्न करणार: आमदार किशोर आप्पा पाटील
