ईसा तडवी, प्रतिनिधी
पाचोरा, 6 नोव्हेंबर : लेक लाडकी योजना, मुख्यमंत्री माझी लाडकी बहिण योजना राबवून तसेच मुलींना मोफत शिक्षण देऊन महायुती सरकारने नारी शक्तीचा सन्मान केला, असे प्रतिपादन पाचोरा-भडगाव विधानसभा मतदारसंघाचे आमदार किशोर आप्पा पाटील यांनी केले. पाचोऱ्यातील तुळजाई जिनिंग मोंढाळा रोड परिसरात आमदार किशोर आप्पा पाटील यांच्या प्रमुख उपस्थितीत माळी समाज बांधवांची संवाद बैठक पार पडली. यावेळी ते बोलत होते.
आमदार किशोर आप्पा पाटील काय म्हणाले? –
आमदार किशोर आप्पा पाटील उपस्थितांसोबत संवाद साधताना म्हणाले की, मुख्यमंत्री एकनाथ शिंदे यांनी बेरोजगाराची समस्या लक्षात घेता राज्यातील 25 लाख तरूणांना सरकारच्या विविध विभागात नोकरी देण्याचे प्रयत्न केले. तसेच मुख्यमंत्री तीर्थ दर्शन योजनेच्या माध्यमातून जेष्ठ नागरिकांना मोठ्या प्रमाणात देवदर्शनाचा लाभ मिळाला. राज्यातील तरूण-तरूणी, शेतकरी तसेच महिला, ज्येष्ठ नागरिक यांच्यासाठी सरकारकडून राबविण्यात येणाऱ्या योजना अशाच प्रकारे पुढे चालू ठेवण्यासाठी महायुतीचे सरकार पुन्हा आणावे लागेल, असे आवाहन आमदार किशोर आप्पा पाटील यांनी केले.
महात्मा फुले यांचे स्मारक उभारणार –
मतदारसंघात छत्रपती शिवाजी महाराजांचे स्मारक उभारण्याचे काम केले. आता ज्या-ज्याठिकाणी माळी समाजबांधव आहेत. त्या-त्याठिकाणी महात्मा फुले यांचे स्मारक उभारण्याचे काम येणाऱ्या काळात केले जाईल, अशी ग्वाही आमदार किशोर आप्पा पाटील यांनी दिली. तसेच माळी समाजाच्या मंगल कार्यालयासाठी 50 लाख रुपयांचा निधी देण्यात काम करू, असेही ते म्हणाले. दरम्यान, पाचोरा शहरातील महात्मा ज्योतिबा फुले आणि धर्मवीर संभाजी महाराजांच्या पुतळ्याचे उभारणी करण्याचे काम सुरू झाले असून लवकरच त्यांचे काम पुर्णत्वास येईल, असेही आमदार पाटील यांनी सांगितले.
‘मतदारसंघात एक नवा इतिहास घडवायचाय!’ –
विरोधक मला सर्व बाजूने घेरण्याचा प्रयत्न करतात. मात्र, मतदारसंघातील जनतेचे आशीर्वाद माझ्या पाठीशी असल्याने मी त्यांच्यासमोर डगमगत नाही. मी विरोधकांवर बोलण्यापेक्षा मला विकासावर बोलायला आवडतं. यामुळे मी प्रचारासाठी गावागावात जात असताना मतदारांमध्ये प्रचंड उत्साह असून येत्या 20 नोव्हेंबरची वाट मतदार पाहत आहेत. पाचोरा-भडगाव मतदारसंघात एक नवा इतिहास घडवायचाय, अशा आशेवर ते बसलेले आहेत, असेही आमदार किशोर आप्पा पाटील म्हणाले.
‘मतदारसंघातील जनता माझ्या पाठीशी’ –
सरकारचे हात बळकट करण्यासाठी तुमच्या प्रतिनिधीची निवड तुम्हाला करून द्यावी लागेल. आणि मला खात्री आहे की, मतदारसंघातील जनता माझ्या पाठीशी आशीर्वाद देऊन प्रचंड मतांनी विजयी करेल, असा विश्वास आमदार किशोर आप्पा पाटील यांनी व्यक्त केला. यावेळी माळी समाजबांधवांसह शिवसेना, भाजप, रिपाईसह महायुतीतील पक्षाचे पदाधिकारी कार्यकर्ते मोठ्या संख्येने उपस्थित होते.
हेही वाचा : Special Report : पाचोऱ्यातील लढतीकडे राज्याचे लक्ष, जळगाव जिल्ह्यात ‘या’ उमेदवारांमध्ये होणार काट्याची टक्कर
