जळगाव : तृतीयपंथीय बंद्यांकरीता उत्तर महाराष्ट्रातील पहिले बॅरेक जळगावात तयार बांधण्यात आले आहे. राज्याचे करागृह विशेष महानिरीक्षक डॉ. जालिंदर सुपेकर यांच्या हस्ते आणि जिल्हाधिकारी आयुष प्रसाद यांच्या उपस्थितीत या बॅरेकचे उद्घाटन करण्यात आले.
जळगाव जिल्हा कारागृहमध्ये तृतीयपंथीय बंद्याकरीता उत्तर महाराष्ट्रातील पहिलं बॅरेक बांधण्यात आले आहे. तर जळगाव जिल्हा कारागृह वर्ग-2 मध्ये पुरुष बंद्यांकरीता दोन नवीन बॅरेक बांधण्यात आले आहेत. या कारागृहाची बंदी क्षमता 200 इतकी असून यात प्रत्यक्ष 524 बंदी बंदिस्त आहेत.
नवीन बॅरेकच्या बांधकामामुळे कारागृहामध्ये 60 बंदी सामावून घेईल, इतकी नवीन वाढीव क्षमता निर्माण झालेली आहे. या बॅरेक बांधकामाचे उद्घाटन कारागृह विशेष पोलीस महानिरीक्षक डॉ. जालिंदर सुपेकर यांच्या हस्ते काल सोमवारी करण्यात आले. यावेळी जिल्हाधिकारी आयुष प्रसाद उपस्थित होते.
या जिल्हा कारागृहाकरीता जिल्हा नियोजन समिती कडून एकूण 1 कोटी 10 लाख 80 हजार 213 रुपये निधी प्राप्त झाला होता. यात पुरुष बंद्यांकरीता दोन नवीन बॅरेक 73 लाख 77 हजार 514 रुपये व तृतीयपंथी बंद्याकरीता एक बॅरेक 37 लाख 2 हजार 699 रुपये खर्च करुन बांधकाम करण्यात आलेले आहे.
जिल्हा सामान्य रुग्णालयाच्या मदतीने कारागृहातील बंद्यांचे टी.बी., एच आय व्ही, क्षयरोग, कुष्ठरोग, व इतर आवश्यक आरोग्य तपासणी करण्यात आली. तसेच आरोग्य तपासणी नुसार बंद्यांवर उपचार देखील करण्यात आलेले आहेत.
तसेच कारागृहाच्या सुरक्षा व्यवस्थेकरीता चार वॉचटॉवर, मुख्यप्रवेशव्दार, स्वयपांकगृह रंगरगोटीची कामे प्रगतीपथावर असल्याने डॉ. जालिंदर सुपेकर यांनी कामाची पाहाणी करून कामे तत्काळ पुर्ण करण्याच्या सुचना दिल्या आहेत.
बॅरेक बांधकामाच्या उद्घाटनावेळी जिल्हाधिकारी आयुष प्रसाद, जळगावचे अतिरिक्त पोलीस अधीक्षक नखाते, वरिष्ठ तुरुंगाधिकारी गजानन विठ्ठल पाटील व इतर सर्व कर्मचारी उपस्थित होते.
