ईसा तडवी, प्रतिनिधी
पाचोरा, 31 जानेवारी : पाचोरा-भडगाव विधानसभा मतदारसंघाचे आमदार किशोर आप्पा पाटील यांच्या सूचनेनुसार नगर परिषद प्रशासनाने पाचोरा शहरातील शासकीय जागेवरील सुमारे 3500 अतिक्रमित घरे नियमानुकूल करून नावावर लावण्याबाबतची कार्यवाही सुरू झाली असून आज शहरातील जनता वसाहत भागातील धम्मोदय बौद्ध विहार भागातून अतिक्रमित घरे मोजणी प्रक्रियेचा आमदार किशोर पाटील यांच्या हस्ते शुभारंभ करण्यात आला.
पाचोरा शहराचे काही टप्पे केले असून आज पहिल्या टप्यात शहरातील जनता वसाहत भागातील सुमारे 250 घरांच्या मोजणी होणार आहे. यामुळे वर्षानुवर्षे अतिक्रमित घरे नावावर होण्याची आस लाऊन बसलेल्या सर्वसामान्य नागरिकांच्या चेहऱ्यावर आनंद फुलला आहे.
शासनाचे 2011 पूर्वीची सरकारी जमिनीवरील रहिवासी क्षेत्रातील घरांचे अतिक्रमण नियमनाकुल करण्याचे धोरण आहे. मात्र, याबाबत कार्यवाही होत नसल्याने अतिक्रमण धारकांनी आमदार किशोर आप्पा पाटील यांची भेट घेत विषय मार्गी लावण्याची विनंती केली होती.
त्या अनुषंगाने आमदार किशोर पाटील यांनी पाचोरा व भडगाव शहर हद्दीतील सर्वच शासकीय जागेवरील अतिक्रमित धारकांची घरे नावावर लावण्याबाबत शासकीय आदेशाप्रमाणे तात्काळ कार्यवाही करण्याचे आदेशित केल्याने पाचोरा नगरपरिषद प्रशासनाने आवश्यक मोजणी फी भरून मोजणी प्रक्रियेला सुरुवात केली आहे. यामध्ये पाचोरा व भडगाव शहरातील नगरपालिका हद्दीतील सुमारे 7 हजार अतिक्रमण घरे असून टप्प्याटप्प्याने ही घरे नावावर लावण्यात येणार आहेत.
हेही वाचा – pachora crime : पाचोऱ्यात गावठी कट्टे, आमदारांकडून DPC मध्ये मुद्दा उपस्थित, माजी आमदार काय म्हणाले?
