शेंदुर्णी (जामनेर), 17 फेब्रुवारी : पाचोरा-भडगाव मतदारसंघाचे माजी आमदार तथा राष्ट्रवादी काँग्रेस शरदचंद्र पवार पक्षाचे नेते दिलीप वाघ हे भारतीय जनता पक्षात प्रवेश करणार असल्याच्या चर्चांना उधाण आले आहे. अशातच आता मुख्यमंत्री देवेंद्र फडणवीस यांच्या जळगाव जिल्हा दौऱ्यानंतर दिलीप वाघ यांनी भाजप पक्षप्रवेशावर भाष्य केलंय.
दिलीप वाघ काय म्हणाले? –
मुख्यमंत्री देवेंद्र फडणवीस हे काल जळगाव जिल्हा दौऱ्यावर होते. या दौऱ्यात मुख्यमंत्र्यांच्या उपस्थितीत शेंदुर्णीत आयोजित केलेल्या कार्यक्रमात दिलीप वाघ यांनी देवेंद्र फडणवीसांसोबत चर्चा केली. यानंतर दिलीप वाघ यांनी भाजप प्रवेशाबाबत माहिती देताना सांगितले की, भाजपमध्ये प्रवेश करण्यासंदर्भात याआधी मंत्री गिरीश महाजन यांच्यासोबत चर्चा झालीय. तसेच आता देवेंद्र फडणवीसांसोबतही प्रवेशाबाबत बोलण झालंय.
भाजप पक्षप्रवेशाचे सांगितले कारण –
म्हणून मी आणि माझ्यासह असंख्य कार्यकर्त्यांसह मुंबईतील प्रदेश कार्यालयात भाजप प्रदेशाध्यक्ष चंद्रशेखर बावनकुळे तसेच मुख्यमंत्री देवेंद्र फडणवीस यांच्या हस्ते प्रवेश करण्याचे निश्चित झालेले आहे. यासोबच पाचोरा-भडगावमधील कार्यकर्त्यांसाठी मेळावा आयोजित करण्याचे ठरले आहे. दरम्यान, राष्ट्रवादी काँग्रेस पक्षात दोन गट असल्याने मी अपक्ष निवडणूक लढलो. मात्र, या निवडणुकीत पक्षाचे मला सहकार्य मिळाले नसल्याने भाजपने केलेल्या केंद्रातील आणि राज्यातील कामामुळे कार्यकर्त्यांची मानसिकता भाजपमध्ये प्रवेश करण्याची असल्याने आम्ही पक्षप्रवेशाचा निर्णय घेतला असल्याचे दिलीप वाघ यांनी स्पष्ठ केले.
हेही वाचा : ‘…..अन् अनर्थ झाला!’; नवी दिल्ली रेल्वे स्टेशनवर चेंगराचेंगरी नेमकी कशामुळे झाली?
