पुंछ (जम्मू), 8 मे : भारताने पाकिस्तान तसेच पीओकी हद्दीतील 9 दहशतवाद्यांची तळे उद्ध्वस्त करत ऑपरेशन सिंदुर यशस्वी केलंय. यावरून पाकिस्तान चांगलाच हादरलाय. ऑपरेशन सिंदुरनंतर पाकिस्तानी लष्कराकडून काल बुधवारपासून सीमालगतच्या भागात गोळीबार सुरू आहे. दरम्यान, या गोळीबारात हरियाणातील एक जवान शहीद झाल्याची माहिती मिळतेय.
जम्मूच्या पुंछमध्ये हरियाणाचा जवान शहीद –
मिळालेल्या माहितीनुसार, हरियाणा राज्यातील पलवल येथील रहिवासी लान्स नायक दिनेश कुमार शर्मा (वय 32) सध्या पुंछमध्ये भारतीय सैन्य दलात तैनात होते. ‘ऑपरेशन सिंदूर’ नंतर पाकिस्तानकडून गोळीबार सुरू झाला. त्यावेळी दिनेश आपल्या काही सहकाऱ्यांसह प्रत्युत्तर देत होते. तेवढ्यात पाकिस्तानकडून एक बॉम्ब त्यांच्या समोर पडला आणि त्याचा स्फोट होताच दिनेश व त्याचे 4 सहकारी गंभीर जखमी झाले.
आज हरियाणात होणार अंत्यसंस्कार –
पाकिस्तानकडून टाकण्यात आलेल्या बॉम्बमुळे लान्स नायक दिनेश कुमार व त्यांचे 4 सहकरी गंभीररित्या जखमी झाल्याने त्यांना तात्काळ रूग्णालयात दाखल करण्यात आले. मात्र, उपचारादरम्यान रुग्णालयातच दिनेश यांनी प्राण सोडले. याबाबतची माहिती त्यांच्या कुटुंबियांना देण्यात आली असून आज हरियाणातील पलवल येथे त्यांच्या शासकीय इतमामात अंत्यसंस्कार केले जाणार आहेत.
दिनेश 2014 साली सैन्यात भरती –
दिनेश कुमार हे 2014 साली सैन्यात भरती झाले होते. गेल्या 11 वर्षांत त्यांची भारतातील विविध ठिकाणी पोस्टिंग झाली होती. दिनेश हे पाच भावंडामध्ये सर्वांत मोठे होते. तर त्यांच्या पाच भावंडांपैकी 2 भाऊ अग्नवीर योजनेच्या माध्यमातून सैन्यात भरती झाले होते. तसेच त्यांची पत्नी सीमा ह्या वकील आहेत. दिनेश यांना एक मुलगा आणि एक मुलगी अशी दोन मुले आहेत आणि त्यांची पत्नी सीमा गर्भवती असल्याचे समजते.
