जळगाव, 30 मे : चोपडा तालुक्यातील बोरमढी येथील एका आदिवासी महिलेची भर रस्त्यात प्रसूती झाल्याची घटना उघडकीस आल्यानंतर जिल्हा प्रशासनाला धारेवर धरले जात होते. या घटनेनंतर जिल्हाधिकारी आयुष प्रसाद तसेच जिल्हा परिषद सीईओ मिनल करनवाल यांनी घटनास्थळी भेट देऊन वैद्यकीय पथकासह संपूर्ण परिस्थितीची पाहणी केली होती. (ZP CEO Minal Karanwal)
या पाहणीनंतर चोपडा तालुक्यातील एका उपकेंद्रात महिलेच्या प्रसूतीसंदर्भात घडलेल्या गंभीर प्रकरणाची सखोल चौकशी सुरू झाली आहे. अहवालात जे दोषी आढळतील त्यांच्यावर कठोर कारवाई करण्यात येणार असल्याची माहिती जि.प. मुख्य कार्यकारी अधिकारी मीनल करनवाल यांनी काल 29 मे रोजी सांयकाळी घेतलेल्या पत्रकार परिषदेत दिली.
चौकशीसाठी समिती गठित –
मिनल करनवाल यांनी सांगितले की, कर्जाणे उपकेंद्रात आलेल्या एका गर्भवती महिलेला वेळेवर योग्य उपचार न मिळाल्याने रस्त्यात प्रसूती करण्याची दुर्दैवी वेळ आली. या गंभीर घटनेची दखल घेत यांनी तात्काळ एक चौकशी समिती गठित केली आहे. या समितीमध्ये एका वरिष्ठ अधिकाऱ्याची अध्यक्ष म्हणून, तर जिल्हा आरोग्य अधिकारी आणि अतिरिक्त सिव्हिल सर्जन यांची सदस्य म्हणून नेमणूक करण्यात समिती आली आहे. दरम्यान, 31 मेपर्यंत संपूर्ण प्रकरणाचा तपशीलवार अहवाल सादर जाणार आहे. आणि यामध्ये जे दोषी आढळतील त्यांच्यावर कठोर कारवाई करण्यात येणार असल्याची माहिती करनवाल मिनल यांनी दिलीय.
माहेरघर योजनेची दिली माहिती –
यावेळी पत्रकार परिषदेत मुख्य कार्यकारी अधिकारी मिनल करनवाल यांनी माहेरघर योजनेची माहिती दिली. माहेरघर योजनेअंतर्गत प्रसूतीपूर्वी 8 ते 10 दिवस अगोदर प्राथमिक आरोग्य केंद्रात जाऊन राहिल्यास गर्भवती महिला आणि तिच्या पतीला राहण्याची, जेवणाची सुविधा, तसेच मजुरीची भरपाईदेखील दिली जाणार आहे. यामुळे सर्व गर्भवती महिलांना आणि त्यांच्या कुटुंबीयांना ‘माहेरघर’ योजनेचा लाभ घेण्याचे आवाहन सीईओ मिनल करनवाल यांनी केले आहे.
