जळगाव, 22 ऑक्टोबर: एल निनोच्या पार्श्वभूमीवर राज्यात उद्भवू शकणारी दुष्काळी परिस्थिती आणि संभाव्य पाणीटंचाई लक्षात घेता, जिल्ह्यातील अपूर्ण पाणीपुरवठा योजनांची सद्यस्थिती जाणून घेऊन त्या वेळेत पूर्ण करण्याच्या दृष्टीने जिल्हा परिषदेच्या मुख्य कार्यकारी अधिकारी करिश्मा नायर यांच्या अध्यक्षतेखाली गुरुवारी (दि. 22) रोजी जिल्हा परिषदेच्या शाहू महाराज सभागृहात आढावा बैठकीचे आयोजन करण्यात आले होते. या बैठकीत पाणीपुरवठा योजनांचे कंत्राटदार तसेच संबंधित अभियंता उपस्थित होते.
बैठकीत जिल्ह्यात सुरू असलेल्या आणि अद्याप अपूर्ण असलेल्या पाणीपुरवठा योजनांच्या कामांचा आढावा घेण्यात आला. संभाव्य पाणीटंचाईच्या पार्श्वभूमीवर ग्रामीण भागातील नागरिकांना वेळेत आणि पुरेशा प्रमाणात पाणी उपलब्ध होण्यासाठी योजनांची कामे पूर्ण करणे आवश्यक असल्याचे यावेळी अधोरेखित करण्यात आले.
अपूर्ण पाणीपुरवठा योजनांची कामे प्राधान्याने पूर्ण करण्यासाठी कंत्राटदार आणि संबंधित अधिकारी व अभियंत्यांनी परस्पर समन्वय राखून काम करावे. कामकाजातील अडचणी दूर करून योजनांची अंमलबजावणी गतिमान करावी, असे आवाहन मुख्य कार्यकारी अधिकारी करिश्मा नायर यांनी यावेळी केले.
संभाव्य पाणीटंचाईचा प्रभाव कमी करण्यासाठी प्रशासनाने आवश्यक नियोजन करणे गरजेचे असून, पाणीपुरवठा योजनांची कामे वेळेत पूर्ण झाल्यास ग्रामीण भागातील नागरिकांना दिलासा मिळण्यास मदत होणार आहे. त्यामुळे संबंधित यंत्रणेने जबाबदारीने काम करून पाणीपुरवठा योजनांच्या पूर्ततेला प्राधान्य द्यावे, असे निर्देश यावेळी देण्यात आले.
हेही वाचा: बिश्नोई गँगच्या कारवायांवरून नाना पटोलेंची सरकारवर टीका; टायगर श्रॉफ प्रकरणावर खुलासा करण्याची मागणी
