एरंडोल, 30 मे : जळगाव जिल्ह्यात लाचखोरीचे प्रकरण ताजे असतानाच एरंडोल तालुक्यातून मोठी बातमी समोर आली आहे. एरंडोल तालुक्यातील निपाणे येथील हरिहर माध्यमिक हायस्कूलमधील मुख्याध्यापकला 3 हजार 600 रूपयांची लाचप्रकरणात जळगाव लाचलुचपत प्रतिबंधक विभागाने अटक केलीय. संदीप प्रभाकर महाजन (वय 45 रा. निपाणे ता. एरंडोल) असे अटक केलेल्या मुख्याध्यापकाचे नाव आहे. तक्रारदाराच्या पत्नीचे वैद्यकीय बिल मंजूर करवून घेण्यासाठी मुख्याध्यापकाने ही लाच मागितल्याप्रकरणी त्याच्यावर जळगाव एसीबीने ही कारवाई केलीय.
नेमकं प्रकरण काय? –
मिळालेल्या माहितीनुसार, तक्रारदार निपाणे येथील हरिहर माध्यमिक हायस्कूलमध्ये कार्यरत आहेत. तक्रारदाराच्या पत्नीचे 23 हजार 815 रूपये इतके वैद्यकीय बिल होते आणि हे बिल मंजूर होण्यासाठी या कर्मचाऱ्याने शाळेचे मुख्याध्यापक संदीप महाजन यांच्याकडे सादर केले होते. दरम्यान, हे बिल आपण आपल्या ओळखीने जिल्हा रूग्णालय व वेतन अधीक्षक तसेच माध्यमिक शिक्षण विभाग यांच्याकडून मंजूर करून घेतो असे आश्वासन देत 5 हजार रूपयांची लाच मागितली.
….अन् एसीबीने केली कारवाई –
तक्रारदार आणि मुख्याध्यापक यांच्यात तडजोडीअंती मुख्याध्यापकाला 3 हजार 600 रूपये देण्याचे ठरले. दरम्यान, या तक्रारदाराने जळगाव लाचलुचपत प्रतिबंधक विभागाकडे तक्रार दाखल केली. त्यानुसार, संदीप महाजन याच्यावर कारवाई करण्यात आली असून कासोदा पोलीस स्टेशन येथे गुन्हा दाखल करण्यात आला आहे.
यांनी केली कारवाई –
जळगाव लाचलुचपत प्रतिबंधक विभागाचे पोलिस उप अधीक्षक योगेश ठाकूर यांच्या मार्गदर्शनाखाली सफौ सुरेश पाटील, पोहेकॉ किशोर महाजन, पो.ना. बाळू मराठे. पोकॉ प्रदीप पोळ आदींनी ही कारवाई केली आहे.
दुसऱ्यांदा सापडला लाचप्रकरणात –
मुख्याध्यापक संदीप महाजन याने यापूर्वी याच कर्मचाऱ्याकडून वेतन निश्चितीच्या फरकाची 2 लाख 53 हजार 780 रूपये एवढी रक्कम मिळवून देण्यासाठी 12 हजार 500 रूपये लाच मागितली होती आणि तडजोडअंती 10 हजार रूपये लाच स्विकारली होती. याप्रकरणातही महाजन याच्यावर 27 जून 2024 रोजी कासोदा पोलिस ठाण्यात गुन्हा दाखल करण्यात आला होता.
