नवी दिल्ली, 4 जून : नवी दिल्लीतील रेल्वे भवन येथे केंद्रीय राज्यमंत्री श्रीमती रक्षा खडसे यांनी रेल्वे बोर्डाचे चेअरमन सतीश कुमार यांची भेट घेऊन भुसावळ रेल्वे विभागातील रावेर स्थानकावर काही महत्त्वाच्या गाड्यांचे थांबे मिळावेत, अशी मागणी केली.
या बैठकीत भुसावळ रेल्वे विभागातील स्थानिक नागरिकांच्या वाढत्या मागणीनुसार काही महत्त्वाच्या गाड्यांचे थांबे रावेर, वरणगाव स्थानकांवर देण्याबाबत चर्चा झाली. याचबरोबर, प्रवाशांच्या सोयीसाठी काही महत्त्वाच्या खालील नमूद रेल्वेगाड्यांचे थांबे तात्काळ मंजूर करावेत, अशी विनंती सुद्धा करण्यात आली.
- नवजीवन एक्स्प्रेस गाडी क्र. 12656 – बोदवड थांबा
- दानापुर पुणे एक्सप्रेस गाडी क्र. 12150- रावेर थांबा (पुणे मार्ग)
- महानगरी एक्सप्रेस गाडी क्र. 22177- रावेर थांबा
रावेर या ठिकाणी गाड्यांचे थांबे देण्यात आल्यास शालेय व महाविद्यालयीन विद्यार्थी, शेतकरी, व्यापारी, नोकरदार, कामगार वर्ग आणि सामान्य प्रवाशांना मोठा दिलासा मिळेल. तसेच यामुळे संपूर्ण परिसराचा सामाजिक व आर्थिक विकास साधला जाईल. रेल्वे मंत्रालयाकडून यावर सकारात्मक प्रतिसाद मिळेल, अशी अपेक्षा रक्षा खडसे यांनी व्यक्त केली आहे.
दरम्यान, रेल्वे बोर्डाचे चेअरमन सतीश कुमार यांनी या मागण्यांकडे सकारात्मकपणे लक्ष देण्याचे आश्वासन दिले असून, लवकरच यावर निर्णय घेण्यात येईल, अशी अपेक्षा व्यक्त करण्यात आली आहे. या बैठकीस रेल्वे विभागाचे वरिष्ठ अधिकारीही उपस्थित होते.
