मुंबई, 22 ऑगस्ट : यंदाच्या श्री. गणेशोत्सवानिमित्त राज्याच्या मुख्यमंत्री सहाय्यता निधी कक्ष व धर्मादाय रुग्णालय मदत कक्षाच्या समन्वयाने राज्यभर ‘श्रीगणेशा आरोग्याचा’ अभियानांतर्गत समुदाय आरोग्य शिबिरे आयोजित करण्यात येणार आहेत. ही शिबिरे 27 ऑगस्ट ते 5 सप्टेंबर 2025 दरम्यान राबविण्यात येणार आहेत.
समुदाय आरोग्य शिबिरांमध्ये केंद्र व राज्य शासन पुरस्कृत विविध आरोग्य योजनांबाबत जनजागृती केली जाणार असून नागरिकांना मोफत तपासणी, चिकित्सा व उपचाराची सुविधा उपलब्ध करून दिली जाणार आहे. यासाठी जिल्हा आरोग्य विभाग, महाराष्ट्र आरोग्य विज्ञान विद्यापीठ संलग्न वैद्यकीय महाविद्यालयांतील अधिकारी, वैद्यकीय विद्यार्थी व पॅरामेडिकल कर्मचारी यांचे सहकार्य घेण्यात येणार आहे.
तसेच मुख्यमंत्री सहाय्यता निधीशी संलग्न रुग्णालये, धर्मादाय रुग्णालये, महात्मा ज्योतिराव फुले जन आरोग्य योजना संलग्न रुग्णालये, सार्वजनिक आरोग्य विभागाची अधिनस्त रुग्णालये, स्टेमी तरोग HLL यंत्रणा, वैद्यकीय महाविद्यालये, अन्न व औषध प्रशासन तसेच सेवाभावी संस्था यांच्या सहभागातून हा उपक्रम राबविला जाणार आहे. दरम्यान, ही शिबिरे आयोजित करण्याबाबतचे आदेश मुख्यमंत्री वैद्यकीय सहाय्यता निधी कक्षाचे प्रमुख रामेश्वर नाईक यांनी जारी केले आहेत.
