जळगाव, 1 ऑगस्ट : जळगाव जिल्ह्यातून एक धक्कादायक बातमी समोर आली आहे. जळगाव शहरातील मूळच्या रहिवासी असलेल्या आणि मुंबई येथील केईएम हॉस्पिटल येथे कार्यरत डॉक्टर तरुणाने ऑनड्युटी इंजेक्शन घेऊन आत्महत्या केली. डॉ. आदिनाथ संजय पाटील (वय 27, रा. एकविरा हॉस्पिटल, आकाशवाणी चौक परिसर, जळगाव) असे मृत डॉक्टर तरुणाचे नाव आहे. ही धक्कादायक घटना सोमवार 31 जुलैला समोर आली. या घटनेने संपूर्ण राज्यात खळबळ उडाली आहे.
काय आहे संपूर्ण घटना –
फिजिशियन डॉ. संजय पाटील, डॉ. स्मिता पाटील हे दाम्पत्य जळगाव शहरात आकाशवाणी चौक परिसरात वास्तव्यास आहे. आदिनाथ हा त्यांचा मोठा मुलगा होता. मागील 6 वर्षांपासून आदिनाथ हा मुंबईच्या केईएम हॉस्पिटल येथे पदवी आणि त्यानंतर पदव्युत्तर शिक्षण घेत होता. त्याचा लहान भाऊ अजिंक्य हासुद्धा केईएम हॉस्पिटल येथे पदवीचे वैद्यकीय शिक्षण घेत होता.
आदिनाथ पाटील याची क्षयरोग विभागात ड्युटी होती. रविवारी रात्री 1 वाजेपर्यंत तो त्याच्या वरिष्ठ डॉक्टरांसह कामावर होता. हसतखेळत असताना त्याने ड्युटी पूर्ण केली. सोमवारी सकाळी रुग्णालयातील एक कर्मचारी हा नेहमीप्रमाणे कामावर आल्यावर 8 वाजेच्या सुमारास टीबी विभागाचा दरवाजा आतून बंद दिसला. यावेळी त्यांनी तो दरवाजा उघडला असता, आदिनाथ हा बेशुद्धावस्थेत दिसून आला. यानंतर त्याला तत्काळ उपचारार्थ दाखल केले असता तेथे वैद्यकीय अधिकाऱ्यांनी त्याला मृत घोषित केले.
आदिनाथ याच्या हातावर ३ वेळा इंजेक्शन टोचलेले दिसून येत होते. त्यामुळे त्याने इंजेक्शन घेऊन आत्महत्या केल्याचे प्रथमदर्शनी दिसून आले आहे. यानंतर संध्याकाळी 5 वाजता त्याचे शवविच्छेदन पूर्ण झाल्यावर मृतदेह जळगावकडे रवाना करण्यात आला आहे.
मृत्यूचे नेमके कारण –
दरम्यान, आदिनाथ पाटील हा अत्यंत हुशार विद्यार्थी होता. बारावीनंतर त्याने दिलेल्या नीट परीक्षेत तो राज्यातून दुसरा तर देशातून 84 वा आलेला होता. रुग्णालयातही तो हसतमुख, मनमिळावू, हुशार, प्रामाणिक विद्यार्थी होता. त्यामुळे आदिनाथच्या मृत्यूमुळे त्याच्या कुटुंबीयांना, केईएमच्या विद्यार्थाना, शिक्षकांना मोठा धक्का बसला आहे. अद्याप आदिनाथने अचानक आत्महत्या का केली, याबाबतचे नेमके कारण समोर आलेले नाही. याप्रकरणी मुंबईतील भोईवाडा पोलीस स्टेशनला घटनेची नोंद करण्यात आली आहे. दरम्यान, ही घटना समोर आल्यानंतर जळगाव जिल्ह्यासह राज्यात खळबळ उडाली आहे.
