जळगाव, 30 नोव्हेंबर : तेलंगणातील सीतापुरम येथून पाचोरा तालुक्यातील डोकलखेडा गावात लग्न समारंभासाठी निघालेल्या दाम्पत्याचा मृतदेह अखेर शनिवारी 29 डिसेंबर रोजी दुपारी विहिरीत आढळून आला. खामगाव–मलकापूर मार्गावरील वडनेर भोलजी उड्डाणपुलाजवळील झाडाझुडपांनी वेढलेल्या विहिरीत त्यांची कार आढळली असून, त्यातच दोन्ही जण मृत अवस्थेत सापडले. मृत दाम्पत्याची नावे पद्मसिंह दामू पाटील (49) आणि नम्रता पाटील (45) अशी असून त्यांच्यावर आज डोकलखेडा येथे दुपारी 1 वाजता अंत्यसंस्कार पार पडणार आहेत. दरम्यान, दाम्पत्याच्या निधनामुळे गावावर शोककळा पसरली आहे.
दाम्पत्य झाले होते बेपत्ता –
सीतापुरममधील एका सिमेंट कंपनीत कार्यरत असलेले पद्मसिंह पत्नीसमवेत एमएच 13 बीएन 8483 या कारने 27 नोव्हेंबर रोजी डोकलखेड्याकडे निघाले होते. त्याच दिवशी सायंकाळी साधारण 6.30 वाजता त्यांचा नातेवाइकांशी शेवटचा संपर्क झाला. त्यानंतर, दोघांचेही फोन बंद येऊ लागल्याने नातेवाइकांनी चिंता व्यक्त केली होती.
बेपत्ता झाल्याने घेतला जात होता शोध –
नांदुरा–मलकापूर महामार्गावरील सीसीटीव्ही फुटेज तपासूनही 28 नोव्हेंबरपर्यंत पोलिसांच्या हाती ठोस माहिती मिळाली नव्हती. शनिवारी सकाळी जिल्हा पोलिस अधीक्षक नीलेश तांबे, अतिरिक्त पोलिस अधीक्षक श्रेणीक लोढा आणि डीवायएसपी आनंद महाजन यांनी नांदुरा पोलिस ठाण्यात आढावा बैठक घेतली. पोलिस निरीक्षक जयवंत सातव यांच्या मार्गदर्शनाखाली शोधमोहीम तीव्र करण्यात आली, तरी दुपारपर्यंत काहीच धागादोरा लागला नव्हता.
दरम्यान, पोलिसांच्या प्राथमिक तपासणीत 27 नोव्हेंबर रोजी सायंकाळी 6 वाजून 31 मिनिटांनी दाम्पत्याने बाळापूर टोलनाका पार केल्याचे आढळले. मोबाईलचे शेवटचे लोकेशन नांदुरा तालुक्यातील वडनेर भोलजी परिसरात मिळाले. त्यानंतर, नांदुरा पोलिस ठाण्यात अधिकृत तक्रार नोंदविण्यात आली होती.
दाम्पत्याचा मृतदेह आढळला –
पोलिसांच्या सखोल तपासानंतर, अखेर शनिवारी दुपारी सुमारे 2 वाजून 20 मिनिटांनी वडनेर उड्डाणपुलाजवळील झुडपांनी वेढलेल्या विहिरीत कारसह दोन्ही मृतदेह आढळून आले. दुपारी 3 वाजून 15 मिनिटांनी क्रेनच्या मदतीने कार बाहेर काढण्याची प्रक्रिया सुरू झाली. दरम्यान, आज दुपारी 1 वाजता डोकलखेडा येथे मृत दाम्पत्यावर अंत्यसंस्कार पार पडणार आहे.
हेही वाचा : नगरपरिषद निवडणुकांसाठी 2 डिसेंबरला सार्वजनिक सुट्टी; राज्य सरकारचा आदेश जारी
