जळगाव, 10 ऑगस्ट : भडगाव तालुक्यातील बालिकेवर लैंगिक अत्याचार करून हत्या केल्याप्रकरणाने संपूर्ण राज्यभरात खळबळ उडाली. दरम्यान, या प्रकरणातील अटकेत असलेल्या आरोपीच्या पोलिस कोठडीत वाढ करण्यात आली आहे.
आरोपीच्या पोलिस कोठडीत वाढ –
भडगाव तालुक्यातील एका गावामधील सात वर्षीय चिमुकलीचे अपहरण व खून केल्याप्रकरणी स्वप्निल उर्फ सोन्या विनोद पाटील याला पुन्हा 11 ऑगस्टपर्यंत पोलिस कोठडी सुनावण्यात आली आहे. 30 जुलै रोजी सात वर्षीय चिमुकली ही बेपत्ता झाली होती. दोन दिवसांनी तिचा मृतदेह कडब्याखाली आढळून आला होता. चौकशीअंती स्वप्निल यानेच तिचा खून केल्याची धक्कादायक बाब समोर आल्यानंतर मागच्या आठवड्यात त्याला अटक करण्यात आली होती.
बालिका हत्याप्रकरणातील आरोपीला अटक केल्यानंतर शुक्रवार, 4 ऑगस्ट रोजी भडगाव पोलिसांनी त्याला जिल्हा न्यायालयात हजर केले असता त्याला 9 ऑगस्टपर्यंत पोलिस कोठडी सुनावली होती. यादरम्यान त्याची विचारपुस केली असता त्याने सहकार्य केले नसून वेळ काढून नेली. त्यामुळे त्याला पुन्हा पोलिस कोठडीची मागणी भडगाव पोलिसांनी केली. त्यानंतर त्याला पुन्हा 11 ऑगस्टपर्यंत पोलिस कोठडी सुनावण्यात आली आहे. दरम्यान, बालिका हत्येप्रकरणी सरकार पक्षातर्फे जिल्हा सरकारी वकील सुरेंद्र काबरा यांनी काम पाहिले.
बालिका हत्याप्रकरण –
भडगाव तालुक्यातील एका गावातील 7 वर्षीय मुलगी रविवारी 30 रोजी सायंकाळी घरी मिळून आली नाही. त्यामुळे तिच्या पालकांनी तिच्या अपहरणाची तक्रार पोलीस ठाण्यात केली होती. यानंतर दोन दिवसांनी म्हणजे मंगळवारी 1 ऑगस्टला कुजलेल्या अवस्थेत या चिमुकलीचा मृतदेह त्यांच्या घराजवळील शेतकऱ्यांच्या कडबा कुट्टीत मिळून आला होता. दरम्यान, पोलिसांनी तपासाची चक्रे फिरवताच आरोप स्वप्निल पाटीलला ताब्यात घेतले होते. दरम्यान, आरोपीच्या पोलिस कोठडीत 11 ऑगस्ट पर्यंत म्हणजेच दोन दिवसांची वाढ करण्यात आली आहे.
