जळगाव, 7 फेब्रुवारी : राज्यातील ६५ वर्षे व त्यावरील ज्येष्ठ नागरिकांच्या दैनंदिन जीवनात मदत व्हावी तसेच वयोमानपरत्वे येणाऱ्या अपंगत्व व अशक्तपणावर उपाय म्हणून सामाजिक न्याय विभागामार्फत मुख्यमंत्री वयोश्री योजना राबविण्यात येत आहे. या योजनेअंतर्गत आवश्यक सहाय्यक साधने व मानसिक आरोग्य सेवांसाठी अनुदान देण्यात येते.
मात्र, जिल्ह्यातील तालुका आरोग्य अधिकाऱ्यांमार्फत प्राप्त झालेल्या काही अर्जांमध्ये आधारकार्डवरील माहिती व बँक खात्याच्या तपशिलात तफावत आढळून आल्याने संबंधित लाभार्थ्यांच्या खात्यावर अनुदानाची रक्कम जमा होऊ शकलेली नाही. अशा लाभार्थ्यांची यादी संबंधित तालुका आरोग्य अधिकाऱ्यांकडे पाठविण्यात आली आहे.
तसेच ही यादी जळगाव जिल्हाधिकारी कार्यालयाच्या jalgaon.gov.in या संकेतस्थळावर तसेच समाजकल्याण विभागाच्या वेबपेजवर उपलब्ध करून देण्यात आली आहे. यादीतील ज्येष्ठ नागरिकांनी आपले आधारकार्ड व आवश्यक कागदपत्रे संबंधित तालुका आरोग्य अधिकारी कार्यालयात किंवा सहाय्यक व्हॉट्सअॅप क्रमांक ९४२३१८४७६७ वर सादर करावीत, असे आवाहन सहाय्यक आयुक्त, समाजकल्याण, जळगाव यांनी केले आहे.
