दौंड, 24 फेब्रुवारी: दौंड परिसरातून एक दुर्दैवी घटना समोर आली असून भुसावळ येथील जंगली महादेव हुडको कॉलनीत राहणाऱ्या २२ वर्षीय तरुणाचा रेल्वेतून पडून मृत्यू झाला आहे. अंशुम पुरोहित (शर्मा) वय – २२ असे मयत तरूणाचे नाव असून पुणे येथून भुसावळला येत असताना येवत रेल्वे स्थानकाजवळ ही घटना घडली. दरम्यान, या घटनेनंतर परिसरात आणि कुटुंबावर शोककळा पसरली आहे.
नेमकं काय घडलं? –
मिळालेल्या माहितीनुसार, भुसावळ येथील अंशुम पुरोहित (शर्मा) हा पुण्यातील एका कंपनीत इंजिनिअर पदावर कार्यरत होता. दिनांक २३ फेब्रुवारी रोजी पहाटे तो पुणे येथून भुसावळसाठी रवाना झाला होता. दरम्यान, पुणेवरून भुसावळकडे येणाऱ्या रेल्वेत प्रचंड गर्दी असल्यामुळे त्याला दरवाज्याजवळ उभे राहून प्रवास करावा लागला.
रेल्वेतून खाली पडल्याने मृत्यू –
दरम्यान, सुमारे तासाभरानंतर पहाटे अंदाजे ४.३० वाजण्याच्या सुमारास येवत स्टेशनजवळ त्याचा तोल गेल्याने तो रेल्वेतून खाली पडला. दरम्यान, या अपघातात त्याचा जागीच मृत्यू झाला. घटनेची माहिती मिळताच दौंड रेल्वे पोलिसांनी तत्काळ घटनास्थळी धाव घेतली. पंचनामा करून मृतदेह शवविच्छेदनासाठी दौंड येथील शासकीय रुग्णालयात पाठविण्यात आला.
मृताची ओळख पटविल्यानंतर सायंकाळी सुमारे ७ वाजता त्यांच्या कुटुंबीयांना घटनेची माहिती देण्यात आली. मुलाच्या निधनाची बातमी ऐकून कुटुंबीयांवर दु:खाचा डोंगर कोसळला असून अंशुम याच्या पश्चात वडील, आई आणि दोन मोठ्या बहिणी असा परिवार आहे.
