पाचोरा, 30 मार्च: पाचोरा तालुक्यातील सातगाव डोंगरी येथे 20 मार्चपासून आयोजित संगीतमय श्रीमद् भागवत कथेचा समारोप 27 मार्च रोजी उत्साहात पार पडला. या कथेसाठी भागवताचार्य प.पू. योगी हिरानंदजी महाराज यांचे प्रभावी वाणीमधून मार्गदर्शन लाभले असून दररोज रात्री 8 ते 11 या वेळेत कथा सादर करण्यात आली. तसेच ह.भ.प.चतुर्भुज महाराज धरणगावकर यांच्या काल्याच्या किर्तनाने सप्ताहची सांगता करण्यात आली. राजरवाल परिवाराच्या वतीने गेल्या पाच वर्षांपासून हा आध्यात्मिक सोहळा अत्यंत सुंदर पद्धतीने आयोजित केला जात आहे.
आजोबा आणि वडील यांच्या पुण्यस्मरणारर्थ गेल्या पाच वर्षांपासून श्रीमद् भागवत कथा तथा ग्रंथराज ज्ञानेश्वरी पारायण सोहळा गोकुळ परदेशी आणि सुकलाल परदेशी या राजरवाल परीवाराकडून आयोजित केला जातो. शेवटच्या दिवशी महाप्रसादाचे आयोजन करण्यात येत असते. कार्यक्रमात सकाळी काकडा, दुपारी श्री ग्रंथराज ज्ञानेश्वरी पारायण व सायंकाळी हरीपाठ नित्यनेमाने होत असतो.
या सोहळ्यात गावातील भजनी मंडळाने सेवा देत कार्यक्रमाची शोभा अधिक वाढवली. ग्रंथराज ज्ञानेश्वरी पारायणाचे व्यासपीठ हरिभक्त परायण मोहन बाप्पा हुंबे (धाराशिवकर) यांनी सांभाळले. तर भागवत कथेचे प्रभावी निरूपण परमपूज्य योगी हिरानंद महाराज यांनी केले. सप्ताहाची सांगता धरणगावकर हरिभक्त परायण चतुर्भुज महाराज यांच्या काल्याच्या कीर्तनाने झाली. समारोपाच्या दिवशी महाप्रसाद (अन्नदान) कार्यक्रमाचेही आयोजन करण्यात आले होते. या संपूर्ण सप्ताहाच्या यशस्वी आयोजनासाठी गावातील भजनी मंडळी, धार्मिक क्षेत्रातील मान्यवर तसेच ग्रामस्थांनी मोठे परिश्रम घेतले.
