मुंबई, 1 एप्रिल: महायुती सरकारच्या काळात प्रशासनात मोठ्या प्रमाणावर फेरबदल करण्यात आले असून राज्यातील 10 वरिष्ठ आयएएस अधिकाऱ्यांच्या बदल्यांचे आदेश जारी करण्यात आले आहेत. यामध्ये मुख्यमंत्र्यांच्या अतिरिक्त मुख्य सचिव अश्विनी भिडे यांची मुंबई महापालिकेच्या आयुक्तपदी नियुक्ती करण्यात आली आहे. तसेच कडक व धडाडीचे अधिकारी म्हणून ओळख असलेले तुकाराम मुंढे यांची दिव्यांग कल्याण विभागातून राज्याच्या आपत्ती व्यवस्थापन, पुनर्वसन व मदत कार्य विभागात बदली करण्यात आली आहे.
आश्विनी भिडे यांची मुंबई महापालिकेच्या आयुक्तपदी नियुक्ती –
मुख्यमंत्र्यांच्या अतिरिक्त मुख्य सचिव अश्विनी भिडे यांची मुंबई महानगर पालिकेच्या आयुक्तपदी नियुक्ती करण्यात आली. यानंतर त्यांनी कालच मावळते आयुक्त भूषण गगराणी यांच्याकडून पदभार स्वीकारला. दरम्यान, अश्विनी भिडे ह्या मुंबई महापालिकेच्या इतिहासातील पहिल्या महिला आयुक्त ठरल्या आहेत.अश्विनी भिडे या 1995 बॅचच्या आयएएस अधिकारी आहेत. या आधी त्यांनी अनेक महत्त्वाच्या पदांवर काम केलं असून मेट्रो वूमन म्हणूनही त्यांची ओळख आहे.
सनदी अधिकारी तुकाराम मुंढेंची बदली –
सनदी अधिकारी तुकाराम मुंढे यांनी दिव्यांग कल्याण विभागात कार्यरत असताना बोगस दिव्यांग प्रमाणपत्रांच्या प्रकरणांवर कठोर कारवाई केली होती. या मोहिमेत अनेक जिल्ह्यांतील जिल्हा परिषदांमधील शेकडो कर्मचाऱ्यांवर निलंबनाची कारवाई करण्यात आली होती. ही कारवाई सुरू असतानाच त्यांच्या बदल्याचा निर्णय घेण्यात आला असून आता राज्याच्या आपत्ती व्यवस्थापन, पुनर्वसन व मदत कार्य विभागात बदली करण्यात आली आहे.
राज्यातील ‘या’ अधिकाऱ्यांच्या झाल्या बदल्या –
- लोकेश चंद्र यांची महाराष्ट्र राज्य वीज वितरण कंपनी लि.चे अध्यक्ष व व्यवस्थापकीय संचालक पदावरून मुख्यमंत्री यांच्या अतिरिक्त मुख्य सचिवपदी, मुंबई येथे नियुक्ती करण्यात आली आहे.
- अश्विनी भिडे यांची मुख्यमंत्री यांच्या अतिरिक्त मुख्य सचिव पदावरून बृहन्मुंबई महानगरपालिकेच्या आयुक्तपदी नियुक्ती करण्यात आली आहे.
- विकास चंद्र रस्तोगी यांची कृषी विभागातील अतिरिक्त मुख्य सचिव पदावरून वित्त विभागातील अतिरिक्त मुख्य सचिव (वित्तीय सुधारणा), मंत्रालय, मुंबई येथे नियुक्ती करण्यात आली आहे.
- विनिता वैद्य सिंघल यांची आपत्ती व्यवस्थापन, पुनर्वसन व मदत कार्य विभागाच्या प्रधान सचिव पदावरून मृद व जलसंधारण विभागाच्या प्रधान सचिवपदी नियुक्ती करण्यात आली आहे.
- परिमल सिंह यांची नानाजी देशमुख कृषी संजीवनी प्रकल्प (POCRA) येथील प्रकल्प संचालक पदावरून कृषी विभागातील सचिवपदी नियुक्ती करण्यात आली आहे.
- तुकाराम मुंढे यांची दिव्यांग कल्याण विभागातील सचिव पदावरून आपत्ती व्यवस्थापन, पुनर्वसन व मदत कार्य विभागाच्या सचिवपदी नियुक्ती करण्यात आली आहे.
- लहू माळी यांची शिवशाही पुनर्वसन प्रकल्प लि., मुंबई येथे व्यवस्थापकीय संचालकपदी नियुक्ती करण्यात आली आहे.
- माणिक गुरसळ यांची दिव्यांग कल्याण विभाग, मंत्रालय, मुंबई येथे सचिवपदी नियुक्ती करण्यात आली आहे.
- प्रेरणा देशभ्रतार यांची राज्य कर विभागातील सहआयुक्त पदावरून मत्स्यव्यवसाय विभागाच्या आयुक्तपदी नियुक्ती करण्यात आली आहे.
- पृथ्वीराज बी. पी. यांची पुणे महानगरपालिकेच्या अतिरिक्त आयुक्त पदावरून वसई-विरार महानगरपालिकेच्या आयुक्तपदी नियुक्ती करण्यात आली आहे.
