जळगाव, 14 एप्रिल: लाचलुचपत प्रतिबंधक विभागाने (ACB) जळगाव येथे मोठी कारवाई करत शनिपेठ पोलीस ठाण्यातील पोलीस कर्मचाऱ्याला तब्बल1 लाख रुपयांची लाच घेताना रंगेहाथ पकडले. विनोद पितांबर अहिरे (पोलीस नाईक, शनिपेठ पोलीस स्टेशन, जळगाव) असे त्याचे नाव असून याप्रकरणी शनिपेठ पोलीस स्टेशनमध्ये गुन्हा दाखल करण्यात आला आहे.
नेमकं प्रकरण काय? –
मिळालेल्या माहितीनुसार, जळगाव येथील एका तक्रारदाराच्या मुलाविरुद्ध शनिपेठ पोलीस स्टेशनमध्ये तक्रार अर्ज दाखल होता. या अर्जाची चौकशी पोलीस नाईक विनोद अहिरे यांच्याकडे सुरू होती. संबंधित प्रकरणात कोणतीही कायदेशीर कारवाई न करता अर्ज निकाली काढण्यासाठी अहिरे यांनी तक्रारदाराकडे तब्बल 2 लाख रुपयांची लाच मागितली होती.
…..अन् एसीबीने रचला सापळा –
या मागणीविरोधात तक्रारदाराने 13 एप्रिल 2026 रोजी लाचलुचपत प्रतिबंधक विभाग, जळगाव यांच्याकडे तक्रार दाखल केली. तक्रारीची पडताळणी करताना अहिरे याने 1 लाख रुपयांची लाच मागून ती स्वीकारण्यास संमती दर्शविल्याचे निष्पन्न झाले. यानंतर ACB पथकाने सापळा रचला.
तक्रारदार शनिपेठ पोलीस स्टेशन येथे गेले असता, पोलीस नाईक विनोद अहिरे यांनी पोलीस ठाण्याबाहेरच पंचासमक्ष 1 लाख रुपयांची लाच स्वीकारली. यावेळी ACB पथकाने त्यांना रंगेहाथ पकडले. या प्रकरणी शनिपेठ पोलीस स्टेशनमध्ये गुन्हा दाखल करण्याची प्रक्रिया करण्यात आला असून पुढील तपास लाचलुचपत प्रतिबंधक विभागाकडून करण्यात येत आहे.
यांनी केली कारवाई –
ही कारवाई जळगाव लाचलुचपत प्रतिबंधक विभागाचे पोलीस उपधीक्षक योगेश ठाकुर यांच्या मार्गदर्शनाखाली पोलीस निरीक्षक हेमंत नागरे, पोउप. निरी. सुरेश पाटील, मपोहेकॉ संगिता पवार, पोकॉ राकेश दुसाने, पोकॉ सचिन चाटे, पोकॉ अमोल सुर्यवंशी यांनी केली. दरम्यान, कोणत्याही शासकीय कामासाठी कोणीही लाच मागितल्यास किंवा लाच देण्याची वेळ आल्यास नागरिकांनी तत्काळ लाचलुचपत प्रतिबंधक विभागाशी संपर्क साधावा. भ्रष्टाचाराविरोधात लढण्यासाठी नागरिकांनी पुढाकार घेऊन तक्रार नोंदवावी, असे आवाहन जळगाव एसीबीच्यावतीने करण्यात आले आहे.
हेही वाचा: VIDEO | सूरसम्राज्ञी आशा भोसले अनंतात विलिन; शासकीय इतमामात पार पडले अंत्यसंस्कार
