जळगाव, 21 एप्रिल: राज्यातील वरिष्ठ आयपीएस अधिकाऱ्यांच्या बदलीच्या पार्श्वभूमीवर जळगाव जिल्हा पोलीस दलात महत्त्वपूर्ण बदल करण्यात आला आहे. जळगावचे पोलीस अधीक्षक डॉ. महेश्वर रेड्डी यांची पुणे येथे बदली करण्यात आली असून, त्यांच्या जागी श्रीकांत धिवरे यांची नियुक्ती करण्यात आली आहे. श्रीकांत धिवरे यांनी आज, 21 एप्रिल रोजी दुपारी डॉ. रेड्डी यांच्याकडून पदभार स्वीकारला.
श्रीकांत धिवरे जळगावात रुजू –
धुळे जिल्ह्याचे पोलीस अधीक्षक म्हणून कार्यरत असलेले श्रीकांत धिवरे यांनी जळगाव जिल्हा पोलीस अधीक्षक कार्यालयात हजर होत मावळते एसपी डॉ. महेश्वर रेड्डी यांच्याकडून अधिकृतपणे पदभार स्वीकारला. त्यांच्या नेतृत्वाखाली जळगाव पोलीस दल अधिक सक्षम आणि गतिमान होईल, असा विश्वास प्रशासनाने व्यक्त केला आहे.
View this post on Instagram
श्रीकांत धिवरे हे 2014 बॅचचे आयपीएस अधिकारी असून त्यांनी यापूर्वी विविध महत्त्वाच्या ठिकाणी जबाबदाऱ्या सांभाळल्या आहेत. धुळेपूर्वी त्यांनी पुणे लोहमार्ग पोलीस, गडचिरोली येथे पोलीस उपअधीक्षक, नवी मुंबई येथे उपायुक्त, बीड येथे अप्पर पोलीस अधीक्षक तसेच नागपूर येथे लाचलुचपत प्रतिबंधक विभागात (ACB) कार्य केले आहे.
डॉ. महेश्वर रेड्डी यांना निरोप –
जळगाव जिल्हा पोलीस दलाचे प्रमुख म्हणून कार्यरत असलेले डॉ. महेश्वर रेड्डी यांची पुणे येथे राज्य गुन्हे अन्वेषण विभागात बदली करण्यात आली आहे. या निमित्ताने आज जळगाव पोलीस दलात पदभार हस्तांतरण सोहळा पार पडला. यावेळी डॉ. रेड्डी यांना निरोप देण्यात आला.
त्यांच्या कार्यकाळात केलेल्या उल्लेखनीय आणि उत्कृष्ट कामगिरीबद्दल त्यांचा गौरव करण्यात आला. तसेच त्यांच्या पुढील कारकीर्दीसाठी शुभेच्छा देण्यात आल्या.
राज्यातील 9 आयपीएस अधिकाऱ्यांच्या बदल्या खालीलप्रमाणे –
- तुषार दोशी यांची सातारा येथून सांगली येथे पोलीस अधीक्षक म्हणून बदली
- निखिल पिंगळे यांची पुणे येथील पोलीस उपआयुक्त पदावरून सातारा येथे पोलीस अधीक्षक म्हणून नियुक्ती
- संदीप घुगे यांना सांगलीवरून मुंबईतील राज्य गुप्तवार्ता विभागात पोलीस उपआयुक्त (सुरक्षा) म्हणून नियुक्त
- योगेश गुप्ता यांना कोल्हापूरवरून गडचिरोली परिक्षेत्रात पोलीस उपमहानिरीक्षक (अतिरिक्त जबाबदारी) म्हणून नियुक्ती
- निलोत्पल यांची गडचिरोलीवरूनकोल्हापूर येथे अधीक्षक म्हणून बदली
- एम. रमेश यांची अतिरिक्त पोलिस अधीक्षक पदावरून गडचिरोलीच्या पोलिस अधीक्षकपदी नियुक्ती करण्यात आली आहे.
- डॉ. महेश्वर रेड्डी यांची जळगाववरून पुण्यातील राज्य गुन्हे अन्वेषण विभागात बदली
- श्रीकांत धिवरे यांची धुळेवरून जळगाव येथे अधीक्षक म्हणून नियुक्ती
- राजकुमार शिंदे यांना पुणेयेथून वाशीम येथे पोलीस अधीक्षक म्हणून नियुक्ती
हेही वाचा: उन्हाळ्यात पाणी व वीजपुरवठा अखंडितपणे सुरु ठेवावा; पालकमंत्री गुलाबराव पाटील यांचे निर्देश
