पाचोरा, 1 सप्टेंबर : राज्यात पहिल्यांदाच तालुका स्तरावर घेण्यात येणाऱ्या तसेच गेल्या अनेक दिवसांपासून चर्चेत असलेल्या पाचोरा येथील ‘शासन आपल्या दारी’ कार्यक्रमाची तारीख जाहीर झाली आहे. मुख्यमंत्री एकनाथ शिंदे, उपमुख्यमंत्री देवेंद्र फडणवीस व उपमुख्यमंत्री अजित पवार हे शासन आपल्या दारी कार्यक्रमानिमित्त पाचोरा दौऱ्यावर येणार आहेत.
आमदार किशोर पाटील यांनी दिलेल्या माहितीनुसार, ९ सप्टेंबर रोजी हे तिघेही मान्यवर “शासन आपल्या दारी” या अभियानासाठी पाचोरा दौऱ्यावर येणार आहेत. पाचोरा शहरातील भडगाव रोडवरील शेठ मुरलीधरजी मानसिंगका महाविद्यालयाच्या प्रांगणात हा कार्यक्रम पार पडणार आहे.
मुख्यमंत्री एकनाथ शिंदे, उपमुख्यमंत्री देवेंद्र फडणवीस तसेच उपमुख्यमंत्री अजित पवार यांच्यासह राज्याचे अन्य मंत्री जिल्ह्यातील आमदार, खासदार यावेळी उपस्थित राहणार असल्याचेही आमदार किशोर पाटील यांनी सांगितले आहे.
आमदार पाटील यांनी दिलेल्या माहितीनुसार, या ‘शासन आपल्या दारी’ योजनेचा लाभ घेण्यासाठी सुमारे २५ हजार लाभार्थी उपस्थित राहणार आहेत. तसेच औद्योगिक वसाहत, ५० खाटांचे उपजिल्हा रुग्णालय, ५ कोटी रुपयांचे ऑक्सिजन पार्क (जॉगिंग ट्रॅक) भुमिपुजन, गिरड रोडवरील काकनबर्डी येथील परिसर सुशोभीकरणाचे भुमिपुजन, क्रिडा संकुलाचे भूमिपूजनाचा कार्यक्रम पार पडणार आहे.
