चंद्रकांत दुसाने, विशेष प्रतिनिधी
जळगाव, 26 मे: राज्यात स्थानिक स्वराज्य संस्थांच्या कोट्यातील १७ जागांसाठी विधान परिषद निवडणुकीची प्रक्रिया पार पडत असताना महायुतीमध्ये जागावाटपावरून रस्सीखेच सुरू झाली आहे. जळगाव स्थानिक स्वराज्य संस्था मतदारसंघाच्या जागेसाठी भाजप आणि शिवसेना या महायुतीतील दोन्ही घटक पक्ष आग्रही आहेत. या पार्श्वभूमीवर राजकीय घडामोडींना वेग आला असून शिवसेनेचे लोकसभा संपर्कप्रमुख दिलीप लांडे यांच्या उपस्थितीत पार पडलेल्या बैठकीत जळगावची जागा कोणत्याही परिस्थितीत लढवण्याचा मोठा निर्णय घेण्यात आला आहे.
जळगावात पार पडली शिवसेनेची बैठक –
शिवसेनेचे लोकसभा संपर्कप्रमुख दिलीप लांडे हे दोन दिवसापासून जळगाव दौऱ्यावर होते. अशातच जळगावच्या जागेचा तिढा सुरू असताना त्यांच्या उपस्थितीत जळगावातील एका खाजगी हॉटेलमध्ये राज्याचे पाणीपुरवठा व स्वच्छता मंत्री गुलाबराव पाटील यांच्यासह शिवसेना आमदारांची आणि प्रमुख नेत्यांची महत्त्वाची गोपनीय बैठक पार पडली. या बैठकीत विधानरपरिषद निवडणुकीसंदर्भात विविध विषयांवर तब्बल तासभर चर्चा करण्यात आल्याची माहिती समोर आली आहे.
जळगावची जागा लढवण्यासाठी शिवसेनेचे एकमत –
जळगावात पार पडलेल्या या बैठकीत जळगाव विधान परिषदेची जागा शिवसेनेनेच लढवावी यावर सर्व नेत्यांचे एकमत झाले. भाजपने ही जागा सोडण्यास नकार दिल्यास, महायुतीमध्ये ‘मैत्रीपूर्ण लढत’ करण्याची तयारी शिवसेनेने दर्शवली आहे. यासाठी शिवसेना आमदारांचे शिष्टमंडळ आज उपमुख्यमंत्री एकनाथ शिंदे यांची मुंबईत भेट घेणार आहेत.
“……तर 100 टक्के आमचा उमेदवार उभा राहील!” –
हॉटेलमध्ये पार पडलेल्या बैठकीनंतर आमदार किशोर आप्पा पाटील यांनी माध्यमांसोबत संवाद साधला. यावेळी बोलताना ते म्हणाले की, जळगाव विधान परिषदेची जागा शिवसेनेनेच लढवावी यावर सर्व नेत्यांचे एकमत झाले आहे. या पार्श्वभूमीवर जळगाव विधानपरिषदेची जागा ही भाजपने मोठा भाऊ म्हणून शिवसेनेचा अट्टहास म्हणून सोडावी. जर महायुती म्हणून शिवसेनेला जागा नाही मिळाली तर आम्हाला जळगावात मैत्रीपुर्ण लढतीसाठी परवानगी द्यावी, अशी मागणी आम्ही राज्याचे उपमुख्यमंत्री तथा शिवसेनेचे मुख्य नेते एकनाथ शिंदे यांच्याकडे करणार आहोत.
दरम्यान, जर आम्हाला मैत्रीपुर्ण लढतीसाठी परवानगी मिळाली तर 100 टक्के शिवसेनेचा उमेदवार उभा राहील आणि कुठल्याही परिस्थितीत निवडून येईल अशापद्धतीचे एकमत जळगाव जिल्ह्यातील शिवसेना नेते, आमदार तसेच प्रमुख पदाधिकारी यांचे झाले असल्याचे आमदार किशोर आप्पा पाटील म्हणाले.
शिवसेना आमदार आज उपमुख्यमंत्री एकनाथ शिंदे यांची भेट घेणार –
जळगाव स्थानिक स्वराज्य संस्था मतदारसंघाची जागा ही शिवसेनेला मिळावी, यासाठी जळगाव जिल्ह्यातील शिवसेना आमदारांचे शिष्टमंडळ आज 26 मे रोजी ताततडीने एकनाथ शिंदे यांची भेट घेणार असल्याचीही माहिती काल पार पडलेल्या बैठकीनंतर समोर आली आहे. दरम्यान, जळगावात तापलेल्या राजकीय वातावरणाच्या पार्श्वभूमीवर महायुतीत नेमका कोणता निर्णय होणार, याकडे सर्वांचे लक्ष लागले आहे.
