ईसा तडवी, प्रतिनिधी
पिंप्री खु. (पाचोरा), 20 जून: प्रहार दिव्यांग क्रांती पिंप्री खु. (ता. पाचोरा) येथील नव्या शाखेचे उद्घाटन गुरुवारी (दि. १८ जून) उत्साहपूर्ण वातावरणात पार पडले. दिव्यांग बांधवांच्या विविध समस्या सोडविण्यासाठी तसेच त्यांना शासकीय योजनांचा लाभ मिळवून देण्यासाठी ही शाखा कार्यरत राहणार असल्याचे यावेळी सांगण्यात आले.
आमदार ओमप्रकाश उर्फ बच्चू कडू यांच्या आशीर्वाद व मार्गदर्शनाखाली तसेच प्रहार दिव्यांग क्रांती संघटनेचे पदाधिकारी महेश बढे आणि जिल्हाध्यक्ष दीपक पाटील यांच्या मार्गदर्शनाखाली या शाखेची स्थापना करण्यात आली. पिंप्री खु. येथील साहेबराव पाटील यांनी शाखा स्थापनेसाठी विशेष पुढाकार घेतला असून शाखा स्थापना प्रमुख म्हणून त्यांनी महत्त्वाची भूमिका बजावली.
उद्घाटनप्रसंगी जिल्हाध्यक्ष दीपक पाटील, तालुकाध्यक्ष रवी पाटील, उपजिल्हाध्यक्ष चंद्रशेखर सिंहले, जिल्हा सचिव धर्मराज पाटील यांच्यासह विविध पदाधिकारी उपस्थित होते. तसेच समर्थ दिव्यांग संस्थेचे महाराष्ट्र राज्य अध्यक्ष तथा दिव्यांग सामाजिक कार्यकर्ते परमेश्वर पाटील यांची विशेष उपस्थिती लाभली. पिंपरी गावातील दिव्यांग बंधू-भगिनींनीही कार्यक्रमास मोठ्या संख्येने उपस्थिती दर्शविली.
रिबीन कापून शाखेचे उद्घाटन करण्यात आले. यानंतर आयोजित मार्गदर्शन सत्रात दिव्यांगांच्या कल्याणासाठी राबविण्यात येणाऱ्या विविध शासकीय योजनांची सविस्तर माहिती देण्यात आली. या योजनांचा लाभ कसा घ्यावा, तसेच दिव्यांगांना सामाजिक व आर्थिकदृष्ट्या स्वावलंबी बनविण्यासाठी उपलब्ध असलेल्या संधींबाबत उपस्थित मान्यवरांनी मार्गदर्शन केले. पिंप्री खु. व परिसरातील दिव्यांग बांधवांच्या समस्या सोडविण्यासाठी नव्याने सुरू झालेली शाखा प्रभावीपणे कार्य करेल, असा विश्वास यावेळी उपस्थित पदाधिकाऱ्यांनी व्यक्त केला.
