जळगाव, 8 जुलै: सोशल मीडियावर प्रसिद्धी मिळवण्यासाठी आक्षेपार्ह रील्स तयार करणाऱ्या आणि वाहतूक नियमांचे उल्लंघन करून स्टंटबाजी करणाऱ्यांवर जळगाव पोलिसांनी मंगळवारी (७ जुलै) कारवाई केली. जिल्हा पोलीस अधीक्षक श्रीकांत धिवरे यांच्या मार्गदर्शनाखाली राबविण्यात आलेल्या विशेष सायबर पॅट्रोलिंग मोहिमेत अशा रील्स तयार करणाऱ्या तरुणांची ओळख पटवून त्यांना पोलीस मुख्यालयात बोलावण्यात आले. त्यांना कायद्याची माहिती देत अशा प्रकारच्या कृत्यांपासून दूर राहण्याचा इशारा देण्यात आला.
विशेष सायबर पॅट्रोलिंग मोहिम –
पोलिसांच्या माहितीनुसार, सोशल मीडियावर शस्त्रांचे प्रदर्शन करणे, गुन्हेगारीचे समर्थन करणारे व्हिडिओ तयार करणे, महिलांचा अवमान करणारी सामग्री प्रसारित करणे तसेच सार्वजनिक ठिकाणी धोकादायक स्टंट करून त्याचे रील्स अपलोड करणे, अशा प्रकारांवर विशेष लक्ष ठेवण्यात आले आहे. अशा व्हिडिओंमुळे समाजात चुकीचा संदेश जात असून तरुणांवर त्याचा नकारात्मक परिणाम होत असल्याचे पोलिसांनी सांगितले.
View this post on Instagram
या मोहिमेचा उद्देश केवळ कारवाई करणे नसून, युवकांमध्ये कायद्याबाबत जागरूकता निर्माण करणे आणि सोशल मीडियाचा जबाबदारीने वापर करण्याचा संदेश देणे हा असल्याचे पोलिसांनी स्पष्ट केले.
ही कारवाई उपविभागीय पोलीस अधिकारी नितीन गणापुरे, स्थानिक गुन्हे शाखेचे पोलीस निरीक्षक राहुल गायकवाड आणि त्यांच्या पथकाने सायबर पॅट्रोलिंगच्या माध्यमातून केली. दरम्यान, सोशल मीडियावर कायद्याचे उल्लंघन करणारे किंवा समाजविघातक आशयाचे फोटो, व्हिडिओ अथवा रील्स प्रसारित केल्यास संबंधितांवर कठोर कायदेशीर कारवाई करण्यात येईल, असा इशाराही जळगाव पोलिसांनी दिला आहे.
