जळगाव, 31 जुलै: बोदवड पंचायत समिती कार्यालयातील कनिष्ठ सहाय्यकाला वृद्ध साहित्यिक व कलाकार मानधन योजनेचा प्रस्ताव जिल्हा परिषदेकडे पाठविण्यासाठी लाचेची मागणी केल्याप्रकरणी लाचलुचपत प्रतिबंधक विभागाने रंगेहाथ पकडले आहे. या कारवाईमुळे पंचायत समिती परिसरात एकच खळबळ उडाली आहे. या प्रकरणातील आरोपी उमेश शामकांत सपकाळे (वय ४९) हे पंचायत समिती कार्यालय, बोदवड येथे कनिष्ठ सहाय्यक म्हणून कार्यरत आहेत.
नेमकं प्रकरण काय? –
लाचलुचपत प्रतिबंधक विभागाने दिलेल्या माहितीनुसार, तक्रारदार हे वाद्य कलाकार असून त्यांनी शासनाच्या वृद्ध साहित्यिक व कलाकार मानधन योजनेचा लाभ मिळण्यासाठी ‘आपले सरकार’ पोर्टलवर ऑनलाइन अर्ज केला होता. अर्जाची प्रत पुढील कार्यवाहीसाठी पंचायत समिती, बोदवड येथे जमा करण्यात आली होती. त्यानंतर अर्जाच्या स्थितीची चौकशी करण्यासाठी तक्रारदार पंचायत समिती कार्यालयात गेले असता, प्रस्ताव तयार करून तो जिल्हा परिषद, जळगाव येथे पाठविण्यासाठी कनिष्ठ सहाय्यक उमेश सपकाळे यांनी सुरुवातीला ३ हजार रुपयांची लाच मागितल्याची तक्रार तक्रारदारांनी ३० जुलै रोजी लाचलुचपत प्रतिबंधक विभागाकडे केली.
‘….अन् 600 रुपयांची लाच स्वीकारताना एसीबीच्या जाळ्यात’ –
तक्रारीची पडताळणी करताना पंचांसमक्ष आरोपीने तडजोडीनंतर ६०० रुपयांची लाच स्वीकारण्यास तयारी दर्शविली. त्यानुसार ३० जुलै रोजी पंचायत समिती, बोदवड येथील सामान्य प्रशासन कक्षाबाहेरील गॅलरीमध्ये आरोपी उमेश सपकाळे यांनी पंचासमक्ष तक्रारदाराकडून ६०० रुपयांची लाचेची रक्कम स्वीकारली. त्यावेळी लाचलुचपत प्रतिबंधक विभागाच्या पथकाने सापळा रचून त्यांना रंगेहाथ ताब्यात घेतले. या प्रकरणी बोदवड पोलीस ठाण्यात भ्रष्टाचार प्रतिबंधक अधिनियम, १९८८ च्या कलम ७ अन्वये गुन्हा दाखल करण्यात आला आहे.
यांनी केली कारवाई –
लाचलुचपत प्रतिबंधक विभाग, नाशिक परिक्षेत्राचे पोलीस अधीक्षक भारत तांगडे, अप्पर पोलीस अधीक्षक प्रदीप मैराळे आणि अप्पर पोलीस अधीक्षक कविता फडतरे यांच्या मार्गदर्शनाखाली, पोलीस उपअधीक्षक योगेश ठाकूर यांच्या पर्यवेक्षणात तसेच जळगावच्या पोलीस निरीक्षक तथा सापळा अधिकारी स्मिता नवघरे यांच्या नेतृत्वाखाली पोलीस हवालदार बाळू मराठे, पोलीस कॉन्स्टेबल राकेश दुसाने आणि अमोल सूर्यवंशी यांनी ही कारवाई केली.
