शिवरे (पारोळा), 18 ऑगस्ट: पारोळा तालुक्यातील शिवरे येथे ग्रामसभेदरम्यान झालेल्या गदारोळानंतर ग्रामपंचायत अधिकारी (ग्रामसेवक) प्रल्हाद नारायण पाटील यांचा हृदयविकाराच्या झटक्याने मृत्यू झाल्याची धक्कादायक घटना समोर आली आहे. ग्रामसभेत काही नागरिकांनी हुल्लडबाजी, शिवीगाळ आणि मारहाणीचा प्रयत्न केल्याने पाटील यांना तीव्र मानसिक धक्का बसल्याचे सांगितले जात आहे. ही घटना 16 ऑगस्ट रोजी घडली. याप्रकरणी पोलिसांनी रात्री उशिरा पाच जणांविरोधात सदोष मनुष्यवधाचा गुन्हा दाखल केला आहे.
ग्रामसभेत सरपंच आणि ग्रामसेवकांना जाब विचारला –
पोलिसांनी दिलेल्या माहितीनुसार, शिवरे येथे 16 ऑगस्ट रोजी ग्रामसभेचे आयोजन करण्यात आले होते. सभेदरम्यान काही ग्रामस्थ आक्रमक झाले. त्यांनी सरपंच आणि ग्रामसेवक पी. एन. पाटील यांना जाब विचारत अर्वाच्च भाषेत शिवीगाळ केली. तसेच पाटील यांना मारहाण करण्याचा प्रयत्न केल्याचा आरोप आहे. या प्रकारामुळे पाटील प्रचंड घाबरले. त्यांना अस्वस्थ वाटू लागल्याने त्यांनी ग्रामसभा अर्धवट सोडून उपचारासाठी पारोळा येथील सिव्हिल रुग्णालय गाठण्याचा निर्णय घेतला.
रुग्णालयाकडे जात असताना पाठलागाचा आरोप –
तब्येत बिघडल्याने पाटील स्वतःच्या दुचाकीवरून रुग्णालयाकडे निघाले. मात्र, काही तरुणांनी त्यांचा पाठलाग करण्याचा प्रयत्न केल्याचा आरोप आहे. या प्रकारामुळे पाटील यांना आणखी मोठा मानसिक धक्का बसल्याचे सांगण्यात येत आहे. रुग्णालयात उपचार सुरू असतानाच त्यांना हृदयविकाराचा तीव्र झटका आला. उपचारादरम्यान त्यांचा मृत्यू झाला.
ग्रामसेवक संघटनेचे ठिय्या आंदोलन –
पी.एन. पाटील यांच्या मृत्यूची माहिती मिळताच ग्रामसेवक संघटनेच्या पदाधिकाऱ्यांमध्ये संतापाचे वातावरण निर्माण झाले. पारोळ्यासह जळगाव, अमळनेर, भडगाव आणि पाचोरा येथील ग्रामसेवक संघटनेच्या पदाधिकाऱ्यांनी पारोळा पोलीस ठाण्यात धाव घेत ठिय्या आंदोलन केले.
ग्रामसभेतील मोबाईल व्हिडिओ आणि सीसीटीव्ही फुटेज तपासून दोषींवर तत्काळ कारवाई करावी, अशी मागणी यावेळी करण्यात आली. या आंदोलनाला करणी सेनेच्या पदाधिकाऱ्यांनीही पाठिंबा दिला. दोषींवर कारवाई न झाल्यास तीव्र आंदोलन करण्याचा इशारा देण्यात आला.
सात जणांविरोधात सदोष मनुष्यवधाचा गुन्हा –
आंदोलनानंतर पोलिसांनी प्रकरणाचा तपास सुरू केला. ग्रामसभेतील गोंधळ आणि त्यानंतर झालेल्या कथित पाठलागाच्या पार्श्वभूमीवर सात संशयितांविरोधात सदोष मनुष्यवधाचा गुन्हा दाखल करण्यात आला आहे. या घटनेमुळे पारोळा तालुक्यात हळहळ व्यक्त होत असून, पोलिसांकडून या प्रकरणाचा पुढील तपास सुरू आहे.
