पंढरपूर (सोलापूर), 17 ऑगस्ट: गेल्या अनेक दिवसांपासून चर्चेत असलेल्या नाशिक आणि रायगडच्या पालकमंत्रिपदाचा तिढा अखेर सुटला आहे. नाशिकच्या पालकमंत्रिपदी भाजपचे मंत्री गिरीश महाजन यांची, तर रायगडच्या पालकमंत्रिपदी शिवसेना शिंदे गटाचे मंत्री भरत गोगावले यांची नियुक्ती करण्यात आली आहे. दोन्ही जिल्ह्यांच्या पालकमंत्रिपदासाठी महायुतीतील घटक पक्षांकडून सुरू असलेल्या रस्सीखेचीवर अखेर पडदा पडला आहे.
नाशिकच्या पालकमंत्रिपदी गिरीश महाजन –
नाशिकच्या पालकमंत्रिपदासाठीही महायुतीतील भाजप, शिवसेना आणि राष्ट्रवादी काँग्रेसकडून दावे करण्यात आले होते. मात्र, अखेर भाजपचे ज्येष्ठ नेते आणि मंत्री गिरीश महाजन यांच्याकडे नाशिकची जबाबदारी देण्यात आली आहे. पालकमंत्रिपदी नियुक्ती झाल्यानंतर महाजन यांनी पंढरपुरात विठ्ठलाचे दर्शन घेतल्यानंतर आनंद व्यक्त केला.
मंत्री गिरीश महाजन यांची पहिली प्रतिक्रिया –
“पंढरपुरात आल्यानंतर देवाचे दर्शन घेत असताना ही बातमी समजली. त्यामुळे मला पांडुरंग पावला आहे. मुख्यमंत्री आणि दोन्ही उपमुख्यमंत्र्यांचे आभार मानतो,” अशी प्रतिक्रिया गिरीश महाजन यांनी दिली. नाशिकमधील रस्त्यांच्या प्रश्नावरही त्यांनी भाष्य केले. नाशिकमधील रस्ते सिमेंटचे करण्याचे नियोजन असून, त्यासाठी नागरिकांना काही काळ त्रास सहन करावा लागेल; मात्र त्यानंतर नाशिक स्वच्छ आणि सुंदर होईल, असे महाजन यांनी सांगितले. यापूर्वी आपण कुंभमेळा मंत्री होतो आणि आता नाशिकचे पालकमंत्री झाल्याचेही त्यांनी नमूद केले.
View this post on Instagram
रायगडची जबाबदारी भरत गोगावले यांच्याकडे –
रायगडच्या पालकमंत्रिपदासाठी राष्ट्रवादी काँग्रेसकडून आदिती तटकरे इच्छुक होत्या. तर शिवसेना शिंदे गटाकडून भरत गोगावले यांनी या पदावर दावा केला होता. गेल्या काही दिवसांपासून याबाबत राजकीय चर्चा सुरू होती. अखेर रायगडची जबाबदारी भरत गोगावले यांच्याकडे सोपविण्यात आली आहे. विशेष म्हणजे, दोन दिवसांपूर्वीच रायगडचे पालकमंत्री आपणच होणार असल्याचे संकेत गोगावले यांनी दिले होते. त्यांचे हे भाकीत अखेर खरे ठरले आहे.
