जळगाव, 11 सप्टेंबर: अन्न व औषध प्रशासन कार्यालयास प्राप्त माहितीच्या आधारे दि. ७ ते ९ सप्टेंबर २०२६ या कालावधीत पाचोरा तालुक्यातील भोकरी, वरखेडी-पिंपळगाव रोड, भवरखेड येथील मे. श्री महासर माता राईस मिल येथे अचानक तपासणी करण्यात आली.
या आस्थापनेत महाराष्ट्र राज्याच्या सार्वजनिक वितरण व्यवस्थेशी संबंधित असल्याचा संशय असलेला फोर्टीफाइड तांदूळ आढळून आला. यावेळी सहा अन्न नमुने घेण्यात आले असून, एकूण २,९६,४७६ किलो तांदूळाचा ७८,६३,१५० रुपये किमतीचा साठा संशयावरून जप्त करण्यात आला.
जप्त साठ्यामध्ये ६४,५४६ किलो फोर्टीफाइड राईस, १,३७,९९६ किलो ब्रोकन राईस, १,९९६ किलो प्लेन राईस (डोमेस्टिक पर्पज) विनालेबल, ३,४४६ किलो ब्रोकन राईस (डोमेस्टिक पर्पज) मिसब्रँडेड, ८१,४९६ किलो राईस (Gustolo’s) एक्सपोर्ट आणि ६,९९६ किलो राईस (५% ब्रोकन) मलेशिया एक्सपोर्ट यांचा समावेश आहे.
या आस्थापना केंद्रीय अन्न परवानाधारक असल्याने केंद्रीय अन्न परवाना प्राधिकरणास याबाबत कळविण्यात आले आहे. जप्त करण्यात आलेला फोर्टीफाइड तांदूळ महाराष्ट्र राज्याच्या सार्वजनिक वितरण व्यवस्थेशी संबंधित आहे किंवा कसे, याबाबत अन्न सुरक्षा अधिकाऱ्यांकडून पुढील तपासणी करण्यात येत आहे.
तपासणीदरम्यान आस्थापनेत उंदराची विष्ठा, धूळ, कोळ्यांची जाळी तसेच तांदूळ जमिनीवर साठवून ठेवणे, तांदळाच्या पोत्यांवर उत्पादकाचा पत्ता नमूद नसणे आणि खरेदीची बिले सादर न करणे आदी बाबी निदर्शनास आल्या. या अनुषंगाने अन्न सुरक्षा व मानके अधिनियमांतर्गत पुढील कार्यवाही करण्यात येत आहे.
ही कारवाई अन्न व औषध प्रशासनाचे आयुक्त तुकाराम मुंढे, जिल्हाधिकारी रोहन घुगे, सह आयुक्त (अन्न), ठाणे विभाग एस. एस. जाधव तसेच सह आयुक्त (अन्न), नाशिक विभाग मंगेश माने यांच्या मार्गदर्शनाखाली करण्यात आली. जळगाव कार्यालयाचे सहायक आयुक्त (अन्न) दीनानाथ शिंदे, अन्न सुरक्षा अधिकारी शरद म. पवार, आकाश कै. बोऱ्हाडे, किशोर आ. साळुंखे व योगराज कि. सूर्यवंशी यांनी ही कारवाई केली.
जिल्ह्यात अथवा परिसरात अन्न भेसळीचा प्रकार आढळून आल्यास नागरिकांनी अन्न व औषध प्रशासनाच्या टोल फ्री क्रमांक १८००२२२३६५ वर अथवा तक्रार पोर्टल https://complaints.mahafda.in वर तक्रार नोंदवून प्रशासनास सहकार्य करावे, असे आवाहन अन्न व औषध प्रशासनातर्फे प्रसिद्धी पत्रकाद्वारे केले आहे.
