जळगाव, 3 ऑक्टोबर: विशेष सखोल पुनरीक्षण (SIR) प्रक्रियेच्या अनुषंगाने मतदारांनी आवश्यक कागदपत्रांची पूर्तता करून प्रशासनाला सहकार्य करावे, असे आवाहन जिल्हाधिकारी रोहन घुगे यांनी केले आहे. प्रत्येक पात्र नागरिकाचे नाव मतदार यादीत समाविष्ट राहावे, यासाठी प्रशासनाकडून आवश्यक ती कार्यवाही केली जात आहे.
SIR प्रक्रियेच्या फेज-१मध्ये Unmapped Electors तसेच Logical Discrepancies असलेल्या मतदारांच्या नोंदींची पडताळणी करण्यात येत आहे. यासाठी संबंधित मतदारांकडून आवश्यक कागदपत्रे सादर करण्याची सुविधा उपलब्ध करून देण्यात आली आहे. संबंधित नागरिकांशी BLO (बूथ लेव्हल ऑफिसर) आणि AERO पथकांकडून त्यांच्या घरी जाऊन संपर्क साधला जाणार आहे.
संबंधित मतदाराने आवश्यक कागदपत्रे सादर केल्यानंतर त्याच्या नोंदीचे मॅपिंग पूर्ण झाले किंवा नोंदीतील विसंगतीचे निराकरण झाले, तर स्वतंत्र सुनावणीसाठी उपस्थित राहण्याची आवश्यकता राहणार नाही. त्यामुळे संबंधित नागरिकांनी BLO/AERO पथकाकडून मागण्यात आलेली कागदपत्रे वेळेत उपलब्ध करून देणे आवश्यक आहे.
दरम्यान, प्रारूप मतदार यादीमध्ये आपले नाव आढळून आले नाही, तर संबंधित नागरिकांना नमुना ६ (Form-6) भरून मतदार यादीमध्ये नाव समाविष्ट करण्यासाठी अर्ज करता येणार आहे. त्यामुळे पात्र नागरिकांनी प्रारूप मतदार यादीमध्ये आपले नाव आहे किंवा नाही, याची खात्री करून आवश्यकतेनुसार पुढील कार्यवाही करावी.
प्रत्येक पात्र नागरिकाचे नाव मतदार यादीत समाविष्ट होण्यासाठी प्रशासन आवश्यक ती कार्यवाही करीत आहे. SIR प्रक्रिया सुरळीत आणि अचूकपणे पूर्ण होण्यासाठी नागरिकांचा सक्रिय सहभाग महत्त्वाचा आहे. त्यामुळे नागरिकांनी घरी येणाऱ्या BLO/AERO पथकांना आवश्यक सहकार्य करून मागितलेली कागदपत्रे सादर करावीत, असे आवाहन जिल्हाधिकारी घुगे यांनी केले आहे.
हेही वाचा: दिवेआगर दुर्घटना प्रकरण; आपत्ती व्यवस्थापन मंत्री गिरीश महाजन यांच्या प्रशासनाला महत्वाच्या सूचना
