ईसा तडवी, प्रतिनिधी
पाचोरा, 22 सप्टेंबर : पाचोरा तालुक्यातील गोराडखेडा येथे एकाकडे गावठी पिस्तुल आढळल्याप्रकरणी पाचोरा पोलिसांना कारवाई केल्याची घटना ताजी असतानाचा तालुक्यातून आणखी एक अवैधपणे गावठी पिस्तुल बाळगल्याचे प्रकरण समोर आले आहे.
पाचोरा तालुक्यातील पुनगाव शिवारातुन एका गावठी कट्ट्यासह दोन जणांना पोलिसांनी सापळा रचून ताब्यात घेतले आहे. राहुल अनिल परदेशी (वय – २७) व रामचंद्र गोपीचंद परदेशी (वय – ३७) असं अटक केलेल्या दोघांची नावे आहेत. पोलिसांनी त्यांच्याकडे असलेले साहित्य जप्त करत दोघांविरोधात गुन्हा दाखल केला आहे.
नेमकं काय आहे प्रकरण? –
पोलीसांनी दिलेल्या माहितीनुसार, पाचोरा तालुक्यातील पुनगाव येथे एका इसमाजवळ गावठी बनावटीचे पिस्तुल असल्याची गुप्त माहिती 20 सप्टेंबर रोजी रात्री 10 वाजेच्या सुमारास पाचोरा पोलिसांना मिळाली होती. या अनुषंगाने पोलीस निरीक्षक राहुल खताळ यांनी तत्कास पोलिस उपनिरीक्षक योगेश गणगे यांच्यासह पोलीस कॉन्स्टेबल विश्वास देशमुख, पोलीस कॉन्स्टेबल योगेश पाटील, पो.कॉ. संदिप भोई, प्रकाश शिवदे यांचे पथक तयार करत घटनास्थळी रवाना केले.
पुनगाव शिवारात दोन इसम फिरत असल्याचे निदर्शनास येताच पोलीस उपनिरीक्षक योगेश गणगे यांनी पथकासह सापळा रचत दोन्ही इसमांना ताब्यात घेतले. याप्रसंगी त्यांची झडती घेतली असता त्यातील राहुल परदेशी याचेजवळ गावठी बनावटीचे पिस्तुल आढळुन आले. दरम्यान, पथकाने त्यांना विचारणा केली असता ते उडवाउडवीची उत्तरे देत असल्याने त्यांना ताब्यात घेवुन पोलीस स्टेशनमध्ये आणले.
पोलिस कॉन्स्टेबल प्रकाश शिवदे यांच्या फिर्यादीवरून 20 हजार रुपये किंमतीचे एक काळ्या रंगाचे त्यावर काळे हॅण्डग्रीप असलेले गावठी बनावटीचे पिस्टल (अग्निशस्त्र) त्यास ट्रिगर दबलेले व रिकामी तसेच विना स्प्रिंगची मॅगझिन तिची मागील पट्टी निघालेले असे शस्त्र अनाधिकृतपणे बाळगल्याने दोघांविरूद्ध भाग – 6 गु. र. नं. 347 / 2023 भारतीय हत्यार कलम 3 / 25 प्रमाणे गुन्हा नोंदविण्यात आला आहे. दरम्यान, या घटनेचा पुढील तपास पोलिस निरीक्षक राहुल खताळ यांच्या मार्गदर्शनाखाली पोलिस उपनिरीक्षक योगेश गणगे हे करीत आहे.
