ईसा तडवी, प्रतिनिधी
पाचोरा, 8 मार्च : आज महिला सर्वच क्षेत्रांमध्ये अग्रेसर असून राजकीय आणि सामाजिक क्षेत्रात देखील त्या अतिशय आत्मविश्वासाने पुढे जात आहेत, असे प्रतिपादन शिवसेना उध्दव बाळासाहेब ठाकरे पक्षाच्या नेत्या वैशाली सुर्यवंशी यांनी केले. पाचोरा येथील शिवसेनेच्या मध्यवर्ती संपर्क कार्यालयात आज वैशाली नरेंद्रसिंग सुर्यवंशी यांच्या उपस्थितीत महिला दिन साजरा करण्यात आला.
महिलांच्या सन्मानासाठी 8 मार्च रोजी जगभरात मोठ्या उत्साहात आंतरराष्ट्रीय महिला दिन साजरा केला जात असतो. या पार्श्वभूमीवर शिवसेना-उध्दव बाळासाहेब ठाकरे पक्षाच्या मध्यवर्ती कार्यालयात देखील विशेष कार्यक्रमाचे आयोजन करण्यात आले. याप्रसंगी वैशालीताई सुर्यवंशी यांनी आपल्या भाषणातून नारीशक्तीचा गौरव केला. त्या म्हणाल्या की, राजकीय क्षेत्राचा विचार केला असता ५० टक्के मतदार असणार्या महिला या अतिशय जागरूकपणे आपला अधिकार बजावत असून आगामी काळात याचे दृश्य परिणाम दिसून येतील, असा आशावाद त्यांनी याप्रसंगी व्यक्त केला.
कार्यक्रमाच्या सुरूवातीला वैशाली सुर्यवंशी यांच्या हस्ते माता जिजाऊ, सावित्रीबाई फुले, मीनाताई ठाकरे आदींच्या प्रतिमांचे पूजन करून माल्यार्पण करण्यात आले. याप्रसंगी शिवसेना-उध्दव बाळासाहेब ठाकरे पक्षाच्या महिला पदाधिकारी तिलोत्तमा मौर्य, जयश्री येवले, अनिता पाटील, कुंदन पांड्या, मंदाकिनी पारोचे, लता पाटील तसेच अंगणवाडी सेविका लताबाई पाटील, नलिनी चौधरी, नूतन कासार, सुनिता पाटील, वैशाली चौधरी, सुरेखा मोरे, दुर्गा चौधरी, सुरेखा माळी, पुष्पा सोनार, आणि महिला पोलीस भगिनी उपस्थित होत्या.
