जळगाव, 17 एप्रिल : माजी मंत्री एकनाथ खडसे यांच्याबाबत मोठी अपडेट समोर आली आहे. एकनाथ खडसे यांना जीवे मारण्याची धमकी देण्यात आली. भाजप प्रवेशा आधीच थेट अमेरिकेतून धमकीचा कॉल आल्याची माहिती समोर आली आहे. दरम्यान, याप्रकरणी मुक्ताईनगर पोलीस स्टेशनमध्ये दिलेल्या तक्रारीवरून गुन्हा दाखल करण्यात आला आहे.
एकनाथ खडसे यांना जीवे मारण्याची धमकी –
मिळालेल्या माहितीनुसार, एकनाथ खडसे यांच्या घरी चार वेगवेगळ्या नंबरवरून धमकीचे फोन आले आहेत. तसेच ही धमकीचे फोन दाऊद-छोटा शकील गँगकडून आल्याचे समजते. गेल्या दोन दिवस पासून एका अज्ञात फोनवरून छोटा शकीलचे नाव सांगत आपल्याला जीवे मारण्यात येणार असल्याच्या धमक्या दिल्या जात असल्याचे एकनाथ खडसे यांनी सांगितले.
विदेशातून हे कॉल येत असावेत, असा अंदाज खडसे यांनी व्यक्त केला आहे. दरम्यान, पोलिसांना याबाबतची माहिती दिली असून पोलिस त्याचा सखोल तपास करत आहेत. पोलिसांच्या अहवालात काही गंभीर बाबी समोर आल्या तर गृहमंत्र्यांपर्यंत ही माहिती देऊ, असेही खडसे यांनी सांगितले.
दरम्यान, लखनऊ तसेच अमेरिकेतून धमकीचे फोन आल्यानंतर एकनाथ खडसे यांनी मुक्ताईनगर पोलिसात तक्रार दिली. यावरून मुक्ताईनगर पोलिसांत गुन्हा दाखल करण्यात आला आहे. पोलिस पुढील प्रकरणाचा तपास करत आहेत.
