चंद्रकांत दुसाने, विशेष प्रतिनिधी
नाशिक, 17 मे : रामदेववाडी अपघात प्रकरणावरून माजी खासदार उन्मेश पाटील यांनी मंत्री गिरीश महाजन यांच्यावर आरोप केला होता. दरम्यान, यावर मंत्री गिरीश महाजन यांनी एकेरी उल्लेख करत पलटवार केला. उन्मेश पाटीलच्या डोक्यावर परिणाम झालाय, असे मंत्री गिरीश महाजन म्हणाले. ते नाशिकमध्ये माध्यमांसोबत बोलत होते.
काय आहे संपूर्ण बातमी? –
रामदेववाडी अपघात प्रकरणात संदर्भात बोलताना उन्मेश पाटील म्हणाले होते की, मंत्री गिरीश महाजन यांच्याकडून अपघातात दोषी असलेल्यांना संरक्षण दिले जात आहे. गोरगरीबांवर अन्याय करण्याचे काम ते करत आहेत. दोषींना मुंबईला पाठवण्यात यांचा हात असल्याचा आरोप रामदेववाडी अपघात प्रकरणात उन्मेश पाटील यांनी केला होता. दरम्यान, उन्मेश पाटलाच्या डोक्यावर परिणाम झालाय, असा पलटवार आता मंत्री गिरीश महाजन यांनी केला आहे.
काय म्हणाले मंत्री गिरीश महाजन –
नाशिकमध्ये माध्यमांसोबत बोलताना मंत्री गिरीश महाजन म्हणाले की, उन्मेश पाटील यांच्या डोक्यावर परिणाम झाला आहे. ज्याठिकाणी हा अपघात घडला. त्याठिकाणाची माणसे ही माझ्याच मतदारसंघातील असून अतिशय गरीबीची त्यांची परिस्थिती आहे. म्हणून मी स्वतः 11 वाजेपासून 2.30 वाजेपर्यंत हॉस्पिटलमध्येच होतो. मी पोलिसांसोबत बोललो. गुन्हा दाखल करायला लावला. त्या गाडीत गांज्याच्या पुड्या होत्या. त्याचाही उल्लेख मी त्याठिकाणी करायला लावला.
“निकालाच्या वेळेला समोर ये ” –
“ग्रामस्थांनी गाडीवाल्याला मोठ्या प्रमाणात मारहाण केल्याने त्यांला मुंबईला हलवावे लागले. मात्र, तरीही त्याचावर गुन्हा दाखल करण्यात आला. म्हणून काही तरी वेळ्यासारखे बरबळायचं आणि काहीही बोलयाचे. मला मात्र, उन्मेश पाटलाला उत्तर द्यायची गरज नाही. त्याला म्हणा 4 तारखेला निकालाच्या वेळेला समोर ये आणि बघ आपली जिल्ह्यात काय पथ आहे तर,” असा एकेरी उल्लेख करत मंत्री गिरीश महाजन यांनी जोरदार पलटवार केला.
