भुसावळ, 30 मे : जळगाव जिल्ह्यात गुन्हेगारीच्या घटनांमध्ये वाढ होत असताना भुसावळातून धक्कादायक घटना समोर आली. भुसावळात जुन्या वादातून दोघांची गोळ्या झाडून हत्या करण्यात आली. यामध्ये माजी नगरसेवक संतोष बारसे आणि त्यांच्यासोबत असलेले सामाजिक कार्यकर्त सुनील राखुंडे यांचा मृत्यू झालाय. दरम्यान, या घटनेने जिल्ह्यात खळबळ उडाली आहे.
नेमकं काय घडलं? –
मिळालेल्या माहितीनुसार, भुसावळ शहरातील जुना सातारा रोड भागात कारमधून जात असलेल्या चौघांवर अज्ञातांनी गोळीबार केल्याची घटना काल रात्री घडली. यामध्ये दोन जणांचा मृत्यू झाला. मृतांमध्ये माजी नगरसेवकाचा समावेश आहे. या घटनेनंतर संपूर्ण भुसावळ शहरात पोलिसांनी नाकाबंदी केली असून शहरात तणावाचे वातावरण निर्माण झाले आहे.
दोघांवर अंदाधुंद गोळीबार –
भुसावळ शहरातील माजी नगरसेवक संतोष बारसे यांच्यासोबत इतर तिघे जुना सातारा रोड भागात कारमधून जात होते. दरम्यान, त्यांची कार मरिमाता मंदिर परिसरजवळ येताच दबा धरून बसलेल्या दोघे अज्ञातांनी त्यांच्यावर अंदाधुंद गोळीबार केला. यामध्ये माजी नगरसेवक संतोष बारसे कारमध्ये जागेवरच कोसळले.
भुसावळात तणाव –
संतोष बारसे यांच्यासह एकाला जवळच्या खासगी रूग्णालयात दाखल केले असता डॉक्टरांनी त्यांना मृत घोषित केले. दरम्यान, दोघांचे मृतदेह शवविच्छेदनासाठी जळगाव शासकीय वैद्यकीय महाविद्यालयात पाठवण्यात आले आहेत. दरम्यान, गोळीबाराच्या घटनेमुळे वाढता जमाव आणि तणाव वाढत असल्याचे लक्षात येताच पोलिसांनी नाकाबंदी केली होती.
हेही वाचा : गिरणा नदीत पोहायला गेलेल्या मुलाचा मृत्यू, चाळीसगाव तालुक्यातील दुर्दैवी घटना
